Qaqik Tsarukyanın iqamətgahından üç şir və bir pələng zooparka aparılıb
Ermənistanda iş adamı və siyasətçi Qaqik Tsarukyanın iqamətgahından vəhşi heyvanlar götürülüb.
Crossmedia.az xarici mediaya istinadən xəbər verir ki, hüquq-mühafizə orqanlarının keçirdiyi tədbir zamanı mülkdən üç şir və bir pələng çıxarılıb.
Məlumata görə, heyvanların təhlükəsiz daşınması üçün onlar əvvəlcədən sakitləşdirici dərmanla yatızdırılıb və daha sonra İrəvan Zooloji Parkına aparılıb.
Əməliyyat zamanı, həmçinin 190 ədəd vəhşi heyvan və quş müqəvvası müsadirə edilib. Onların mənşəyinin qanuni olub-olmadığı araşdırılır.
Qeyd olunur ki, Qaqik Tsarukyan barəsində qanunsuz ovçuluq faktı ilə bağlı cinayət işi başlanıb. İlkin qiymətləndirmələrə əsasən, qanunsuz fəaliyyət nəticəsində ekologiyaya 81 min dollardan çox zərər dəydiyi bildirilir.
Araşdırma çərçivəsində canlı yırtıcı heyvanlar maddi sübut statusu alıb və mühafizə məqsədilə İrəvan Zooparkına təhvil verilib.
14:07 07.07.2026
Oxunuş sayı: 53
