ABŞ Müdafiə Nazirliyi “Anthropic”lə əməkdaşlığı dayandırdı
ABŞ Müdafiə Nazirliyi “Anthropic” şirkətinin süni intellekt alətlərindən istifadəsini dayandırıb.
Crossmedia.az xəbər verir ki, “BBC” bu barədə məlumat yayıb.
Pentaqon rəsmisi bildirib ki, Müdafiə Nazirliyi artıq “Anthropic” məhsullarından istifadə etmir. Şirkət bu ilin fevralında ABŞ müdafiə naziri Pit Heqset tərəfindən milli təhlükəsizlik baxımından təchizat zənciri üçün risk kimi qiymətləndirilib və Pentaqonun avqustun sonuna qədər şirkətin məhsullarından imtina edəcəyi açıqlanıb.
Bununla belə, məsələ ilə tanış olan bir neçə mənbə “BBC”yə bildirib ki, ötən həftəyə qədər “Anthropic”in “Claude” süni intellekt modeli Pentaqonda tədqiqat, analiz və kəşfiyyat məlumatlarının toplanması, həmçinin İrana qarşı hərbi əməliyyatlar çərçivəsində istifadə olunub.
Mənbələrin sözlərinə görə, “Claude” böyük həcmdə informasiyanın emalında mühüm vasitə hesab edilib. Bu şəxslər arasında Pentaqonla süni intellekt sahəsində əməkdaşlıq etmiş keçmiş müdafiə rəsmiləri və podratçılar da var.
“Anthropic”in nümayəndəsi Pentaqonun şirkətin məhsullarından istifadəyə son qoyması ilə bağlı açıqlamasına münasibət bildirməyib. Müdafiə Nazirliyinin şirkətlə əməkdaşlığı tam dayandırmasının səbəbi isə açıqlanmayıb.
“Anthropic”in süni intellekt alətlərindən ABŞ hökuməti və ordusu 2024-cü ildən istifadə edirdi. Şirkət məhsulları məxfi işlər aparan dövlət qurumlarında tətbiq olunan ilk qabaqcıl süni intellekt şirkəti olub.
Lakin bu ilin əvvəlində Pentaqon “Anthropic”dən “Claude” modelində təhlükəsizlik məhdudiyyətlərini aradan qaldırmağı və ABŞ ordusuna süni intellekt alətlərinə məhdudiyyətsiz çıxış verməyi tələb edib.
“Anthropic” kütləvi nəzarət və avtonom silahların yaradılması ilə bağlı narahatlıqları əsas gətirərək bu tələbdən imtina edib. Bundan sonra Heqset şirkəti milli təhlükəsizlik baxımından “təchizat zənciri riski” elan edib.
21:45 05.10.2026
Oxunuş sayı: 52
