Medvedevdən Ermənistana xəbərdarlıq: Bunun ağır nəticələri olacaq
Rusiya Təhlükəsizlik Şurası sədrinin müavini Dmitri Medvedev Ermənistan rəhbərliyini tənqid edərək bildirib ki, İrəvan siyasi ambisiyalarını milli maraqlardan üstün tutub.
Crossmedia.az bu barədə xarici mediaya istinadən xəbər verir.
Medvedevin sözlərinə görə, Qərb Ermənistana yalnız Rusiyaya qarşı mübarizədə istifadə ediləcək alət kimi yanaşır və iki ölkə arasında sağlam münasibətlərin tərəfdarı olan siyasi qüvvələrin siyasi səhnədən sıxışdırılmasında maraqlıdır.
O, həmçinin qeyd edib ki, hazırkı hakimiyyətin vizit kartı müxaliflərə qarşı hüquqi özbaşınalığa yaxın təzyiqlər və biznes aktivlərinin əlindən alınması olub. Medvedev bu fikirləri Ermənistanın Çiçəklənən Ermənistan Partiyasının lideri Qaqik Sarukyanla bağlı vəziyyəti şərh edərkən səsləndirib. Onun sözlərinə görə, parlament seçkiləri zamanı müxalifətə təzyiqlər, inzibati resurslardan geniş istifadə və Qərbin müdaxiləsi seçki prosesinin əsas xüsusiyyətlərindən biri olub.
Medvedev vurğulayıb ki, Moskva Ermənistan rəhbərliyinin əsl niyyətlərini sözlərinə deyil, atdığı addımlara əsasən qiymətləndirəcək. O əlavə edib ki, Rusiya hakim Vətəndaş Müqaviləsi Partiyasının ölkədəki seçicilərin əksəriyyətinin mövqeyini nəzərə alacağına ümid edir.
Rusiya rəsmisi sonda xəbərdarlıq edib ki, Ermənistanın Rusiya ilə əlaqələri kəsməsi ölkə vətəndaşları üçün ağır nəticələr doğuracaq. Onun fikrincə, Avropa İttifaqı isə Ermənistanla onilliklər ərzində formalaşmış əlaqələri qorumaqda maraqlı deyil və Qərbin diktəsi altına düşən İrəvanın bu təsirdən qurtulması olduqca çətin olacaq.
13:03 28.06.2026
Oxunuş sayı: 48
