Almaniya 2027-ci ilədək Litvada 5000 hərbçi yerləşdirəcək
Almaniya yaxın tarixinin ən iri hərbi addımlarından birini ataraq, NATO-nun şərq cinahını gücləndirmək məqsədilə Belarus sərhədi yaxınlığında yerləşən Litvaya 5000 hərbçi göndərməyə hazırlaşır.
Crossmedia.az xəbər verir ki, bu barədə "Reuters" agentliyi məlumat yayıb.
Almaniyanın Bundesver ordusu Litvada daimi hərbi qruplaşmanın yerləşdirilməsi prosesinə başlayıb və qüvvələrin sayının 2027-ci ilin sonunadək 5000 nəfərə çatdırılması planlaşdırılır. Hərbi birləşmələr Belarus sərhədinin yaxınlığında yerləşdiriləcək.
Litvanın müdafiə naziri Robertas Kaunas alman qüvvələrinin qəbuluna hazırlıq işlərinin qrafikdən daha sürətlə getdiyini bildirib. Onun sözlərinə görə, tikinti işlərinin birinci mərhələsi artıq başa çatıb və bu, infrastrukturun ikinci mərhələsinə daha tez keçməyə imkan yaradıb.
Hərbçilərin yerləşdirilməsi və onların tam fəaliyyətinin təmin olunması üçün Litvada genişmiqyaslı tikinti işləri aparılır. Layihə çərçivəsində müasir yaşayış kompleksləri, təlim mərkəzləri, həmçinin hərbçilər və onların ailələri üçün məktəblər və tibb müəssisələri daxil olmaqla zəruri sosial infrastruktur yaradılır.
Bundesverin 45-ci tank briqadasının Litvada yerləşdirilməsi regionda təhlükəsizlik sahəsində baş verən dəyişikliklərə strateji cavab kimi qiymətləndirilir. Müdafiə qurumlarının nümayəndələri bildirirlər ki, bu qruplaşmanın yaradılması NATO-nun Belarus sərhədi yaxınlığında müttəfiqlərinin hər qarış ərazisini qorumağa hazır olduğunu nümayiş etdirən əsas çəkindirmə amillərindən biridir.
Hazırda Litvada təxminən 1800 alman hərbçisi xidmət edir. Onlar alyansın şərq cinahında təhlükəsizliyə yönələn istənilən təhdidə operativ cavab vermək qabiliyyətini artırmaq məqsədilə mütəmadi təlimlər keçirirlər.
07:00 23.06.2026
Oxunuş sayı: 55
