Laçında "Yeni Yaşayış Məhəlləsi"nin təməli qoyulur - Deputat danışdı
İşğaldan azad edilmiş ərazilərdə aparılan genişmiqyaslı bərpa və yenidənqurma işləri, xüsusilə Laçında formalaşdırılan yeni yaşayış məhəllələri regionun gələcək inkişaf istiqamətini müəyyənləşdirir. “Ağıllı şəhər” və “ağıllı kənd” konsepsiyası əsasında inşa edilən bu ərazilərdə müasir infrastruktur, sosial xidmətlər və dayanıqlı yaşayış mühiti yaradılır.
Laçında təməli qoyulan “Yeni Yaşayış Məhəlləsi” də məhz bu strategiyanın davamı kimi qiymətləndirilir. Burada sakinlərin məskunlaşması üçün yaşayış evləri ilə yanaşı, məktəb, səhiyyə ocaqları, ictimai iaşə və xidmət sahələri, həmçinin yeni iş yerlərinin yaradılması nəzərdə tutulur. Bu yanaşma təkcə məcburi köçkünlərin geri dönüşünü təmin etmir, eyni zamanda regionun iqtisadi canlanmasına və sosial həyatın bərpasına xidmət edir.
Ümumilikdə, Laçın və digər azad edilmiş ərazilərdə həyata keçirilən layihələr, uzun illərdən sonra bölgənin yenidən həyatla dolmasına və dayanıqlı inkişaf modelinin formalaşmasına yönəlib.
Mövzu ilə bağlı Milli Məclisin deputatı Könül Nurullayeva Crossmedia.az-a açıqlama verib: “İşğaldan azad olunmuş ərazilərdə aparılan genişmiqyaslı bərpa və yenidənqurma işləri Azərbaycanın Böyük Qayıdış strategiyasının əsas istiqamətlərindən biridir. Bu istiqamətdə həyata keçirilən mühüm layihələrdən biri də Laçın şəhərində “Yeni Yaşayış Məhəlləsi”nin təməlinin qoyulmasıdır. Məhəllə Laçının müasir şəhərsalma konsepsiyasına uyğun şəkildə layihələndirilib. Ümumi sahəsi 57 min 470 kvadratmetr olan məhəllədə 19 çoxmənzilli yaşayış binasının inşası nəzərdə tutulur. Bu binalar ümumilikdə 340 mənzildən ibarət olacaq və şəhərin mənzil fondunun genişlənməsinə mühüm töhfə verəcək. Layihə üzrə hazırlıq işlərinə artıq başlanılıb və tikintinin 24 ay ərzində tamamlanması planlaşdırılır. Bütün azad olunmuş ərazilərdə olduğu kimi, Laçında da yaradılan yeni yaşayış məhəllələrində sakinlərin rahat və təhlükəsiz yaşayışı üçün bütün zəruri infrastruktur qurulur. Müasir kommunikasiya xətləri, yol infrastrukturu, enerji və su təchizatı sistemləri, yaşıllıq zolaqları və ictimai məkanlar şəhərin yeni simasını formalaşdırır. Eyni zamanda, işğaldan azad edilmiş ərazilərdə həyata keçirilən layihələr iqtisadi fəallığın artırılmasına da xidmət edir. Tikinti prosesində yüzlərlə insan işlə təmin olunur, həmçinin xidmət, ticarət, turizm və digər sahələrdə yeni məşğulluq imkanları yaranır. Bu xüsusda yeni yaşayış məhəlləsinin inşası da yerli əhalinin məşğulluq imkanlarının genişlənməsinə və sahibkarlıq fəaliyyətinin inkişafına əlavə stimul verəcək”.
Deputat əlavə edib ki, Laçın işğaldan azad olunduqdan sonra burada əhəmiyyətli infrastruktur layihələri icra edilir: “Ötən ilin mayında inşa olunan Laçın beynəlxalq hava limanı da ümumilikdə bölgənin sosial-iqtisadi inkişafına təkan verəcək, turizm potensialının artırılmasına səbəb olacaq. Olduqca mühüm strateji əhəmiyyətə malik olan Laçın aeroportu logistik mərkəzlərin yaradılmasına da töhfədir. Azərbaycanın dəniz səviyyəsindən ən hündürdə yerləşən hava limanı ətraf ərazilərə hava nəqliyyatı ilə gediş-gəlişi asanlaşdıracaq. Məlum olduğu kimi, 30 ilə yaxın müddətdə Laçın şəhəri də digər yaşayış məntəqələrimiz kimi erməni vandalizminə məruz qalmışdı. Ermənistanın sərhəd tanımayan təxribatları 2-ci Qarabağ savaşından sonra da davam edirdi. Təkcə Laçın rayonu ərazisinə 2021-ci ildə, yəni müharibədən sonra 1400-dən çox yeni mina basdırılmışdı. 2023-cü il Azərbaycanın həyata keçirdiyi antiterror əməliyyatı bu təxribatlara da son qoydu. 2023-cü il, mayın 28-də - Müstəqillik Günündə dövlət başçımız Laçın sakinlərinə onların evlərinin açarlarını təqdim etdi. Beləliklə, Laçının dirçəliş dövrü başladı. Laçın həm də beynəlxalq tədbirlərin keçirildiyi məkana çevrilib. Belə ki, Azərbaycan, Türkiyə və Pakistan liderlərinin Zirvə görüşü, İƏT Həftəsi və Şuşa Qlobal Media Forumu çərçivəsində müxtəlif toplantılara məhz Laçın ev sahibliyi etdi. Laçın həm də MDB mədəniyyət paytaxtı elan edilib. Son illərdə Laçında yaşayış evləri, inzibati binalar, təhsil və səhiyyə müəssisələri istifadəyə verilib. Bu layihələr şəhərin sosial-iqtisadi həyatının bərpasını sürətləndirir”.
Ayhan
13:03 08.06.2026
Oxunuş sayı: 53
