Beynəlxaq əməkdaşlıq vasitəsilə Qarabağ daha da inkişaf edə bilər - RƏY
Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Azərbaycanda akkreditə olunmuş diplomatik korpusu Qarabağ Universitetinin xarici ali məktəblərlə əlaqələrinin möhkəmləndirilməsinə kömək etməyə çağırıb.
"Mən həmçinin diplomatik ictimaiyyəti bu ali məktəblə ölkələrinizin analoji təhsil müəssisələri arasında birbaşa əlaqələrin qurulmasına köməklik etməyə, bununla da gəncləri bilik mübadiləsi, təhsilin inkişafı və ən əsası sülh naminə birləşdirməyə çağırardım", - o qeyd edib.
H.Hacıyev vurğulayıb ki, regionda hazırkı sülh mərhələsi xüsusi əhəmiyyət kəsb edir.
"Bu gün hamımız beynəlxalq diplomatik ictimaiyyət olaraq səylərimizi sülh gündəliyinə yönəltməliyik", - o bildirib.
Milli Məclisin deputatı Fariz İsmayılzadə Hikmət Hacıyevin səsləndirdiyi fikirlər, həmçinin Qarabağ universitetinin perspektiv beynəlxalq əməkdaşlığı barədə Crossmedia.az-a danışıb: "Öncə onu deyim ki, səfirliklərin nümayəndələri, səfirlər Azərbaycanın işğal olunmuş ərazilərinə səfər edərkən orada nə qədər quruculuq işləri aparıldığının, Azərbaycanın oraya etdiyi yatırımların, dağıntıların aradan qaldırılması üşün səylərin göstərildiyini şahidi olurlar. Bu beynəlxalq ictimaiyyətə bir daha sübut edir ki, Azərbaycan torpaqları əsl sahibidir və Ermənistan yalnız işğal və dağıntı gətirib. Azərbaycan isə oranı inkişaf etdirir, həyatı qaytarır. Həmin səfirlər öz növbəsində müəyyən layihələr, öz ölkələri ilə əməkdaşlıq təklif edə bilərlər. Hətta Qarabağa öz investorlarını cəlb edə bilərlər. Beynəlxaq əməkdaşlıq vasitəsilə Qarabağ daha da inkişaf edə bilər".
Fatimə
18:11 02.05.2026
Oxunuş sayı: 1158
