Xarici xəbərlər

ABŞ kəşfiyyatı: İranın zərbə potensialı hələ də yüksəkdir

ABŞ kəşfiyyat orqanları hesab edir ki, ABŞ və İsrailin davam edən hərbi əməliyyatlarına baxmayaraq, İran hələ də əhəmiyyətli raket və pilotsuz uçuş aparatı (PUA) zərbə potensialını qoruyub saxlayır.

Crossmedia.az bu barədə "CNN"ə istinadən xəbər verir.

Məlumata görə, ABŞ kəşfiyyatının hesablamalarında İranın raket buraxıcı qurğularının təxminən yarısının hələ də toxunulmaz qaldığı bildirilir. Bundan əlavə, Tehranın pilotsuz uçuş aparatları imkanlarının da təxminən 50 faizini saxladığı qeyd olunur. Həmçinin İranın yeraltı obyektlərdə dron istehsalını davam etdirdiyi vurğulanır.

Hesabatda bildirilir ki, İran sahillərində yerləşdirilən kruiz raketlərinin də əhəmiyyətli hissəsi məhv edilməyib və ölkənin sualtı dəniz imkanları hələ də qalmaqdadır.

ABŞ kəşfiyyatının qiymətləndirməsinə görə, İranın əlində qalan resurslar ona həm raketlərdən, həm də pilotsuz uçuş aparatlarından istifadə edərək zərbələr endirməyə davam etməyə imkan verir. Daha əvvəl isə İslam İnqilabı Keşikçiləri Korpusu (SEPAH) İranın strategiyasının ABŞ və İsrailin hərbi potensialını mümkün qədər tükətmək olduğunu açıqlamışdı.

🖨 Çap et

16:55 03.04.2026

Oxunuş sayı: 317