Bəyanatdan reallığa - Ermənistan Azərbaycanla sülhə nə qədər yaxındır?
Ermənistan Baş naziri Nikol Paşinyanın son 30 ili "yalançı sülh" dövrü adlandırması və hazırkı vəziyyəti "tarixi fürsət" kimi təqdim etməsi, regionun gələcək arxitekturası ilə bağlı sualları yenidən gündəmə gətirib.
Delimitasiya reqlamentləri və konstitusiya islahatları sülhün təməli kimi göstərilsə də, Ermənistan cəmiyyətindəki revanşist əhval-ruhiyyə və "köhnə qvardiya"nın siyasi manipulyasiyaları prosesin kövrəkliyini qoruyur.
Mövzu ilə bağlı Crossmedia.az-a açıqlamasında politoloq İlqar Vəlizadə bildirib ki, Ermənistanın sülhə real yanaşmasının əsas göstəricisi konkret addımlar, xüsusilə də, sülh müqaviləsinin imzalanması olacaq.
Onun sözlərinə görə, hazırda gedən proseslər müəyyən mənada sülh istiqamətində irəliləyiş görüntüsü yaratsa da, həlledici məqam hüquqi və siyasi qərarların praktik nəticələridir:
"Əsas indikator, əlbəttə ki, sülh müqaviləsidir. Məhz bu sənədin imzalanması göstərəcək ki, Ermənistan doğrudan da real sülhün tərəfdarıdır, yoxsa bu, sadəcə siyasi ritorikadır".
Politoloq qeyd edib ki, hazırda Ermənistanda konstitusiya dəyişiklikləri ilə bağlı proseslərin başlanması diqqət çəkir:
"Hazırda proseslər o istiqamətdə gedir ki, Ermənistan öz konstitusiyasında dəyişiklik etməyə hazırlaşır. Yeni konstitusiyanın qəbul olunması ilə bağlı işlərə start verilib, yeni redaksiya hazırlanıb və artıq müzakirələr başlayıb. Yaxın aylarda bu sənədin cəmiyyətə təqdim olunacağı gözlənilir".
Bununla belə, ekspert vurğulayıb ki, yalnız hüquqi sənədlər deyil, cəmiyyətin mövqeyi də əsas göstəricilərdən biridir:
"Konstitusiya və siyasi proseslər vacibdir, lakin cəmiyyətin münasibəti daha önəmli indikator kimi çıxış edir. Hazırda Ermənistan cəmiyyətində birmənalı şəkildə sülhə dəstək olduğunu demək çətindir".
İ.Vəlizadə bildirib ki, ölkədə revanşist əhval-ruhiyyə hələ də güclüdür və bu, siyasi proseslərə təsir göstərir:
"Təəssüf ki, revanşist düşüncəli insanların sayı kifayət qədərdir və bu amildən istifadə edən siyasi qüvvələr öz dayaqlarını möhkəmləndirməyə çalışırlar. Məhz bu səbəbdən sülh məsələsində sözlərdən daha çox real addımlar həlledici rol oynayır. Bizim üçün də əsas olan bəyanatlar deyil, əməli addımlardır. Əgər proseslər real şəkildə sülhə apararsa, o zaman bu barədə ciddi danışmaq olar".
Politoloq əlavə edib ki, Ermənistanın keçmiş siyasi elitasının nümayəndələrinin mövqeyi də sülh perspektivlərinə təsir göstərir:
"Əgər revanşist mövqedə olan şəxslər, məsələn Robert Köçəryan kimi fiqurlar yenidən hakimiyyətə gəlsələr, bu, sülh prosesinə ciddi zərbə olacaq. Belə qüvvələrlə sülh barədə danışmaq belə mümkün deyil. Regionda dayanıqlı sülhün formalaşması yalnız ardıcıl və səmimi siyasi iradə ilə mümkündür və bu istiqamətdə real nəticələr hələlik əsas gözlənti olaraq qalır".
Nigar Yahyazadə
13:37 01.04.2026
Oxunuş sayı: 684
