Fransada etirazlar iğtişaşlara çevrilib: 400-ə yaxın şəxs saxlanılıb
Fransada ölkəboyu keçirilən etiraz aksiyaları zamanı təxminən 400 nəfər saxlanılıb. Saxlanılanların böyük əksəriyyəti yetkin şəxslərdir.
Crossmedia.az xəbər verir ki, bu barədə Fransanın daxili işlər naziri Loran Nunez məlumat verib. BFMTV telekanalının məlumatına görə, Daxili İşlər Nazirliyi ölkə üzrə aksiyalarda 550 min nəfərin, o cümlədən Parisdə 110 min nəfərin iştirak etdiyini açıqlayıb. Təşkilatçılar isə iştirakçıların sayının 800 minə çatdığını bildiriblər.
Parisdə toqquşmalar Respublika meydanında yürüş başlamazdan əvvəl baş verib. Polis qara geyimli və maskalı yüzlərlə nümayişçiyə qarşı bir neçə dəfə gözyaşardıcı qazdan istifadə edib. Etirazçılar fişənglər atıb, hüquq-mühafizə orqanları isə su şırnaqlı maşınlardan yararlanıb.
Paris meri bildirib ki, şəhərin bütöv küçələri sistemli şəkildə dağıdılıb və iğtişaşlar nəticəsində ciddi ziyan dəyib. Paytaxtda 90-dan çox şəxs saxlanılıb. Onların arasında şüşələri sındırılan CNews telekanalının ofisinin yaxınlığında saxlanılanlar da var.
Marsel şəhərində nümayişçilər qısa müddətə meriyanın binasına daxil olaraq “Bastiliyanı alırıq” şüarını səsləndiriblər. Onlar Mariannanın büstünü sındırıb, binaya ziyan vurublar. Şəhərin meri Benua Payan Fransa Prezidenti Emmanuel Makronla danışıqdan sonra əlavə polis qüvvələrinin göndərildiyini bildirib.
Oxşar insidentlər Lill və Bordoda da qeydə alınıb. Bu şəhərlərdə etirazçılar meriya binalarına daxil olublar. Limoges şəhərində isə meriya binasında yanğın baş verib. Sen-Etyen şəhərində bir nümayişçinin polis qumbarası nəticəsində qolu ağır şəkildə zədələnib.
Fransanın Baş naziri Sebastyen Lekorn hüquq-mühafizə orqanlarına qarşı “son dərəcə intensiv zorakılığı” pisləyib və hakimiyyətin təzyiqlər qarşısında geri çəkilməyəcəyini bildirib.
Prezident Emmanuel Makron isə sakitliyə çağırış edərək vurğulayıb ki, etiraz hüququ insanlara və əmlaka hörmətlə ayrılmaz şəkildə bağlıdır.
Qeyd edək ki, bundan əvvəl Fransada etirazçıların mağazaların və bankomatların şüşələrini sındırmağa başladıqları barədə məlumat yayılıb.
22:34 17.10.2026
Oxunuş sayı: 65
