Teatrın gülüşü: Nəsibə Zeynalovanın anım günüdür
Bəzi insanlar sevdikləri sənət uğrunda illərini fəda edir, bəziləri isə taleyin qəribə təsadüfü ilə ən sevdiyi gündə-teatr günündə səhnəni tərk edir.
Teatrı ömrünün mənasına çevirən Nəsibə Zeynalova isə məhz teatr bayramında bu dünyadan köçərək, sənətə olan sevgisini sanki taleyin özü ilə möhürlədi.
Bu gün — 10 mart Azərbaycan teatr və kino sənətinin görkəmli simalarından biri olan Nəsibə Zeynalovanın vəfatının ildönümüdür. Onun adı Azərbaycan səhnəsinin yaddaşına silinməz iz salmış sənətkarlar sırasında xüsusi yer tutur.
1916-cı il 20 aprel tarixində Bakıda dünyaya gələn Nəsibə Zeynalova sənətə bağlı bir ailədə böyüyüb.
Onun atası Cahangir Zeynalov Azərbaycanın ilk realist aktyor məktəbinin formalaşmasında mühüm rol oynamış tanınmış sənətkar idi. O, qızının da səhnə sənəti ilə məşğul olmasını arzulasa da, taleyin sərt sınaqları bu arzunu görməyə imkan vermədi.
Nəsibə Zeynalova hələ iki yaşında olarkən atasını itirdi. Buna baxmayaraq, o, illər sonra atasının yarımçıq qalan arzularını gerçəkləşdirərək, Azərbaycan teatrının ən parlaq aktrisalarından birinə çevrildi.
Gənclik illərində sənətə böyük maraq göstərən aktrisa əvvəlcə rəqs sənəti ilə məşğul olub. Milli rəqslərin incəliklərini öyrənərək müxtəlif səhnələrdə çıxış edib.
Daha sonra aktyorluğa üz tutan Nəsibə Zeynalova 1930-cu illərin əvvəllərində teatr dərnəklərində fəaliyyətə başlayıb və qısa müddətdə diqqət çəkib.
Aktrisanın peşəkar səhnə fəaliyyəti 1930-cu illərin ortalarında başlayıb. O, müxtəlif teatr kollektivlərində çalışaraq təcrübə qazanıb və kəndlərdə təşkil olunan səyyar tamaşalarda iştirak edib. Bu illər onun sənətkar kimi formalaşmasında mühüm rol oynayıb.
1938-ci ildə isə o, Azərbaycan Dövlət Musiqili Komediya Teatrının truppasına qəbul olunub. Məhz bu teatr aktrisanın yaradıcılıq taleyində xüsusi yer tutub.
Uzun illər həmin səhnədə çıxış edən Nəsibə Zeynalova komik və xarakterik rolların ustası kimi tanındı. Tamaşaçılar onu təbii oyunu, incə yumoru və səhnədə yaratdığı canlı obrazlarla sevirdi.
Teatr səhnəsində yaratdığı personajlar müxtəlif xarakterləri əks etdirirdi. O, xüsusilə xalq yumoru ilə zəngin obrazları ustalıqla təqdim edir, gündəlik həyatın koloritini səhnəyə gətirirdi. Aktrisanın ifasında komik personajlar sadəcə gülüş doğurmur, eyni zamanda insan xarakterinin müxtəlif çalarlarını göstərirdi.
Nəsibə Zeynalova təkcə teatr səhnəsində deyil, kino sahəsində də böyük uğurlar qazanıb. O, Azərbaycan kinosunda yadda qalan bir çox obrazlar yaradıb.
Aktrisanınt çəkildiyi filmlər arasında Ögey ana, Böyük dayaq, Ulduz və Qaynana kimi ekran əsərləri xüsusi yer tutur.Bu filmlərdə canlandırdığı obrazlar sadə insanların həyatını, düşüncələrini və məişətini əks etdirirdi. Onun yaratdığı qəhrəmanlar səmimiliyi və təbiiliyi ilə tamaşaçıların yaddaşında qalmağı bacarıb.
Uzun illər Azərbaycan teatrına və kinosuna göstərdiyi xidmətlər yüksək qiymətləndirilib. 1960-cı ildə aktrisa əməkdar artist fəxri adına layiq görülüb, bir neçə ildən sonra isə xalq artisti adına yüksəlib.
Onun yaradıcılığı dövlət mükafatı ilə də təltif olunub. Bu mükafatlar aktrisanın milli mədəniyyətə verdiyi töhfələrin göstəricisi idi.
Yaddaşlarda yaşayan sənətkar
Ömrünü səhnəyə və sənətə həsr edən Nəsibə Zeynalova 10 mart 2004-cü ildə Bakıda vəfat edib. Onun məzarı Birinci Fəxri Xiyabanda yerləşir.
Aktrisanın yaratdığı obrazlar bu gün də Azərbaycan teatr və kino tarixinin dəyərli nümunələri kimi xatırlanır. Onun sənəti təkcə bir dövrün deyil, bir neçə nəslin yaddaşında yaşayan mədəni irsə çevrilib. Səmimi gülüşü, canlı səhnə enerjisi və təbii aktyor oyunu Nəsibə Zeynalovanı Azərbaycan səhnəsinin unudulmaz simalarından biri kimi yaşadır.
İllər keçsə də, onun yaratdığı obrazlar və tamaşaçılara bəxş etdiyi sevinc sənət tariximizdə yaşayır. Bu gün onun xatirəsi ehtiramla anılır və Azərbaycan mədəniyyətində qoyduğu iz hər zaman hörmətlə yad edilir.
Fatimə Məmmədova
12:47 10.03.2026
Oxunuş sayı: 66
