İran tam gücü ilə nüvə silahı əldə etməyə çalışır - AÇIQLAMA
Fransa İranın tezliklə nüvə silahı əldə edəcəyi ilə bağlı xəbərdarlıq edib. Fransa Xarici Kəşfiyyat Xidmətinin rəhbəri Nikolas Lerner bildirib ki, İranın nüvə silahının yayılması riski qarşıdakı aylarda böyük təhlükədir. Həmçinin qeyd edib ki, Fransa və Britaniya xidmətləri yaxın aylarda gözlənilən kritik təhlükəyə qarşı əməldaşlıq edirlər. Bəs İranın yaxın vaxtlarda nüvə silahı əldə etməsi gözlənilirmi? Bu, baş verərsə İranla qarşıdurmada olan ölkələrlə münasibətinə necə təsir göstərə bilər?
Məsələ ilə bağlı Güney Azərbaycan üzrə araşdırmaçı jurnalist Elman Cəfərli Crossmedia.az-a açıqlamasında bildirib ki, adını “dinc məqsədli”, “iqtisadi əhəmiyyətli” qoysa da İran nüvə çalışmalarını davam etdirir:
"Əsas məqsəd də nüvə silahı yaratmaqdır. Beynəlxalq Atom Enerjisi Agentliyi də dəfələrlə bununla bağlı həyəcanlı hesabatlar yayımlayıb. Sonuncu dəfə Beynəlxalq Atom Enerjisi Agentliyinin Rəhbərlər Şurası noyabrın 21-də qurumla əməkdaşlıq etməyən İranın gizli nüvə fəaliyyətini pisləyən qətnamə qəbul edib. Bu günlərdə açıqlama verən İranın xarici işlər naziri Abbas Əraqçı Qərb ölkələrini nüvə proqramı ilə təhdid edib. O, bildirib ki, İrana embarqo qoyulacağı təqdirdə nüvə silahı istehsal edəcək. Nazir qeyd edib ki, ölkəsi hazırda nüvə silahı yaratmaq üçün lazım olan bilik və bacarıqlar əldə edib. İranın Beynəlxalq Əlaqələr üzrə Strateji Şurasının rəhbəri Kamal Xərrazi də açıqlamasında İranın nüvə silahının yaradılması üçün bütün imkanlara malik olduğunu bildirib. O, vurğulayıb ki, İran nüvə silahının yaradılması üçün texniki imkanlara malikdir. BMT-nin Atom Nəzarəti Agentliyinin rəhbəri verdiyi bəyanatda da İran nüvə proqramına toxunub. O, İranın "bir neçə" nüvə bombası istehsal etmək üçün kifayət qədər urana malik olduğu barədə xəbərdarlıq edib".
Həmçinin E.Cəfərli qeyd edib ki, Qərb dairələri İranın blef etdiyini hələ nüvə silahına malik olmadığını bildirir:
"Sabiq vitse-prezident Dik Çeyninin Yaxın Şərq üzrə müşaviri olmuş Devid Vurmser bildirib ki, durum Tehranın iddia etdiyi səviyyədə deyil. O, İslam respublikasının bu məsələdə Şimali Koreya ilə əməkdaşlıq etdiyini, lakin İranın hələ nüvə silahına malik olmadığını deyib. Lakin beynəlxalq birlik bildirir ki, bu cür açıqlamalardan arxayınlaşmaq olmaz. İran tam gücü ilə Uranı zənginləşdirməyə, nüvə silahı əldə etməyə çalışır. Əgər bu reallaşarsa, Yaxın Şərqdə, bütövlükdə dünyada sülh və sabitlik böyük təhlükə altına düşəcək. Sanksiyalardan öncə neftdən külli miqdarda qazanc götürmüş İran rejimi islam inqilabını, hakim Xomeyniçiliyi yaxın xaricə yaymağa başladı. Hazırda İraqda, Livanda, Suriyada yaşananlar böyük ölçüdə İran rejiminin “əl işidir”. İran rejimi hətta Azərbaycana belə ideoloji müdaxilələr etməyə çalışırdı. İran nüvə silahı əldə edərsə qonşulara qarşı aqressiv davranışlara başlayacaq. Yeri gəlmişkən, Azərbaycanın quru sərhədlərini bağlaması da daha çox İrandan gələcək təhlükə ilə bağlıdır”.
Gülşad İbrahimova
11:16 02.12.2024
Oxunuş sayı: 10271
