Artıq çəki həmişə ölüm riskini artırmır – Araşdırma
Artıq çəki hər zaman ölüm riskinin artması ilə əlaqəli deyil. Alimlər müəyyən ediblər ki, əsas təhlükə artıq piy toxumasının daxili orqanların fəaliyyətini pozduğu klinik piylənmə ilə bağlıdır.
Crossmedia.az xəbər verir ki, bu nəticəyə Çin Elm və Texnologiya Universitetinin professoru An Panın rəhbərlik etdiyi beynəlxalq tədqiqat qrupu gəlib. Araşdırmanın nəticələri “Nature” elmi jurnalında dərc olunub.
Tədqiqat çərçivəsində Çin, Böyük Britaniya, ABŞ və İspaniyadan 844 min yetkin insanın sağlamlıq göstəriciləri təhlil edilib. Alimlər iştirakçıların bədən kütləsi indeksini, bel çevrəsini, boy və bel nisbətini, eləcə də tibbi tarixçələrini müqayisə ediblər.
Araşdırmada piylənmənin iki forması fərqləndirilib: klinik və preklinik piylənmə. Klinik piylənmə artıq piy toxumasının orqanların fəaliyyətini pozduğu vəziyyət, preklinik piylənmə isə artıq çəkiyə baxmayaraq orqanizmin funksiyalarının hələ qorunduğu mərhələ kimi xarakterizə olunur.
Nəticələrə əsasən, yalnız bədən kütləsi indeksinə görə müəyyən edilən piylənmə ölüm riskinin artması ilə əlaqələndirilməyib. Klinik piylənmə zamanı ölüm riski 69 faiz, preklinik piylənmə zamanı isə 19 faiz yüksək olub.
Araşdırmanın digər maraqlı nəticəsi ondan ibarətdir ki, preklinik piylənməsi olan insanların 77-91 faizi on il ərzində xəstəliyin klinik mərhələsinə keçməyib.
Tədqiqatçılar bildirirlər ki, bədən kütləsi indeksi piylənmənin müəyyənləşdirilməsi üçün həmişə kifayət qədər dəqiq göstərici deyil. Bu səbəbdən bel çevrəsi və digər sağlamlıq parametrlərinin də nəzərə alınması vacibdir.
Alimlərin fikrincə, yeni yanaşma piylənmənin müalicəsində fərdi risklərin daha düzgün qiymətləndirilməsinə və yüksək riskli xəstələrə tibbi yardımın prioritetləşdirilməsinə imkan yarada bilər.
Qeyd edək ki, araşdırmaya görə, dünyada təxminən 1,5 milyard yetkin insan bədən kütləsi indeksinə əsasən artıq çəkili hesab olunur.
08:33 21.11.2026
Oxunuş sayı: 21