Təhsil sahəsində əməkdaşlığa böyük ehtiyac var- Deputat
Dini Qurumlarla İş üzrə Dövlət Komitəsinin sədri Ramin Məmmədov ABŞ-yə səfəri zamanı Kem C.Qardner adına Siyasət İnstitutunun direktoru Natali Qoçnur ilə görüşündə deyib ki, dini təhsil sahəsində beynəlxalq əməkdaşlığın genişləndirilməsi məqsədilə müxtəlif ölkələrin təhsil müəssisələri ilə əlaqələr qurulur, tələbə mübadiləsi həyata keçirilir, ortaq tədqiqat layihələri icra olunur.
O, Azərbaycanda dini təhsilin inkişafının önəmi, o cümlədən Azərbaycan İlahiyyat İnstitutunun fəaliyyət istiqamətləri barədə məlumat verib.
N.Qoçnur Azərbaycanda dini müxtəliflik, tolerantlıq və mədəni harmoniya prinsiplərinin dövlət siyasətinin ayrılmaz hissəsi kimi həyata keçirilməsini təqdirəlayiq nümunə adlandırıb. İnstitutun beynəlxalq tərəfdaşlarla əməkdaşlığa böyük önəm verdiyini bildirən institut direktoru Azərbaycan təcrübəsinin dinlərarası dialoq, mədəni müxtəliflik və sosial inteqrasiya sahəsində xüsusi maraq doğurduğunu qeyd edib.
Dini Komitənin sədri İsa Məsihin Sonuncu Gün Müqəddəsləri Kilsəsinin Təhsil üzrə İdarə Heyətinin katibi Kelli Hos və Kilsənin Xeyriyyəçilik Mərkəzinin direktoru Şeron Yubenk ilə də görüşüb. Görüşlərdə Azərbaycandakı dövlət-din münasibətləri, dini sahədə həyata keçirilən dövlət siyasəti barədə geniş məlumat verilib, eləcə də dini təhsil və humanitar sahələrdə əməkdaşlıq imkanları müzakirə edilib.
Yuta Dünya Ticarət Mərkəzinin icraçı direktoru Conatan Fridmanla baş tutan görüşdə isə dinlərarası dialoq və vətəndaş cəmiyyətinin inkişafı istiqamətində birgə təşəbbüslərin həyata keçirilməsi barədə fikir mübadiləsi aparılıb.
Milli Məclisin deputatı Ceyhun Məmmədov mövzu barədə Crossmedia.az-a danışıb: “Təhsil sahəsində əməkdaşlığa böyük ehtiyac var. Təhsildə beynəlxalq əməkdaşlıq olmadan yeni təcrübələr əldə etmədən inkişafa nail olmaq qeyri-mümkündür. Təhsildə mütləq şəkildə beynəlxalq təcrübəni öyrənmək və tətbiq etmək lazımdır. Beynəlxalq əməkdaşlıq birmənalı olaraq təhsilimizə töhfə verir və təhsilimizi daha da inkişaf etdirir. Məhz buna görə də bu prosesin faydalı olduğunu, inkişafa aparacağını söyləyə bilərik. Çünki təhsil sahəsində əlaqələr, münasibətlərin inkişafı bu prosesə töhfə verəcək. Əməkdaşlıq təhsil sahəsində müsbət nəticələrə, irəliləyişlərə yol aça bilər. Odur ki, bu əməkdaşlıq çox vacibdir”.
Mehriban İbrahimli
23:47 09.10.2025
Oxunuş sayı: 8645
