Aqrar sığorta sahəsində Türkiyə təcrübəsi öyrənilir
Aqrar Sığorta Fondunun nümayəndələri Türkiyə Tarım Kredit Kooperativləri İttifaqının təmsilçiləri ilə görüşüb
Crossmedia.az xəbər verir ki, Aqrar Sığorta Fondunun nümayəndə heyəti kənd təsərrüfatı sığortaları sahəsində Türkiyə təcrübəsinin öyrənilməsi məqsədilə qardaş ölkəyə səfər edib.
Nümayəndə heyətinin tərkibinə Aqrar Sığorta Fondunun beynəlxalq əlaqələr şöbəsinin müdiri Azər Məmmədov və şöbənin əməkdaşı Aysel Həsənova daxildir. Fond nümayəndələri səfər çərçivəsində Türkiyə Tarım Kredit Kooperativləri İttifaqının təmsilçiləri ilə görüşlər keçiriblər. Görüşdə qarşı tərəfə Azərbaycanda kənd təsərrüfatına dövlət dəstəyi mexanizmləri, aqrar sığortanın tətbiqi modelləri, sığorta prosesinin kənd təsərrüfatına dəymiş zərərlərin qarşılanmasında rolu, Aqrar Sığorta Fondu ilə TARSİM arasında əməkdaşlıq, iki ölkənin aqrar sığorta qurumları kadr və təcrübə mübadiləsinin aparılması, kənd təsərrüfatı sahəsində həyata keçirilə biləcək əməkdaşlıq imkanları barədə geniş məlumat verilib.
Qonaqlara Tarım Kredit Kooperativləri İttifaqının 17 regional bölməsinin olduğu, öz sıralarında 1600-dən artıq kənd təsərrüfatı kooperativini birləşdirdiyi, 188 xidmət mərkəzində ümumilikdə 1 milyondan artıq fermerə xidmət göstərdiyi barədə məlumat verilib. İttifaqın əsas məqsədi kənd təsərrüfatı istehsalçılarının iqtisadi mənfəətlərini qorumaq, qida, sığorta, heyvandarlıq, gübrə, yem, toxum, istixana və müasir suvarma sistemləri ilə təminat ehtiyaclarını qarşılamaqdır.
Görüşdə fermerlərə dövlət dəstəyi mexanizmlərinin effektiv icra olunmasında İttifaqın üzərinə düşən vəzifələr barədə təqdimatlar keçirilib, aqrar fəaliyyətin sığortalanmasının səmərəliliyi barədə geniş müzakirələr aparılıb. Tərəflər aqrar sığorta sahəsində Türkiyə təcrübəsinin öyrənilməsi və Azərbaycanda tətbiqi ilə bağlı davamlı görüşlərin keçirilməsinin mühüm əhəmiyyət kəsb etdiyini vurğulayıblar.
12:06 09.09.2025
Oxunuş sayı: 4985
