Rusiyanı "əcəl girləyir?": Aİ ilə münasibətlər kəskinləşir
Avropa Komissiyasının sədri Ursula fon der Lyayenin Bolqarıstanın Plovdiv şəhərinə enişi zamanı gözlənilməz hadisə yaşanıb. Təyyarənin GPS sistemi işləməz vəziyyətə düşüb və pilotlar məcburən kağız xəritələrdən istifadə edərək təyyarəni təhlükəsiz şəkildə yerə endiriblər. Bolqarıstan Hava Nəqliyyatı İdarəsi insidenti təsdiqləyib. Ehtimal olunur ki, GPS müdaxiləsi Rusiyadan qaynaqlanıb.
Rəsmi Moskva isə bu iddiaları təkzib edib. Maraqlıdır, sədrin təyyarəsinin GPS sisteminə müdaxilədə Rusiyanın "barmağı ola" bilərmi?
Mövzu ilə bağlı Crossmedia.az-a danışan politoloq Sultan Zahidov bildirib ki, bu hadisə təsadüfi görünmür: "Bazar günü Plovdiv istiqamətində hərəkətdə olan Ursula fon der Lyayenin təyyarəsində texniki nasazlıq qeydə alınıb, GPS sistemi sıradan çıxıb və təyyarə fövqəladə vəziyyətdə eniş etməli olub. Avropa İttifaqının (Aİ) rəsmi nümayəndəsi də təsdiqləyib ki, burada Rusiya tərəfindən jamming texnologiyalarının tətbiqi ehtimalı var. Əgər bu sübut olunarsa, İttifaq-Rusiya münasibətlərində gərginlik daha da artacaq. Hadisəyə münasibət bildirən Estoniya da bəyanat yayaraq məsələni ciddi təhlükə kimi qiymətləndirib. Aİ bu barədə araşdırma aparacağını, sübutlar toplanacağı təqdirdə isə Rusiyaya qarşı məsələ qaldıracağını açıqlayıb".
- S. Zahidov hesab edir ki, bu, təkcə texniki məsələ deyil, həm də siyasi mesajdır: “Aİ-nin mətbuat nümayəndəsi vurğulayıb ki, bu hadisə Rusiyanın təxribatçı addımlarının qarşısını almaq üçün qurumun daha vahid cəbhədən çıxış etməsini zəruri edir. Bu, həm də Ukraynaya dəstəyin artırılmasının vacibliyinə işarədir. Əgər Rusiyanın iştirakı sübut olunarsa, Avropa İttifaqı Rusiyaya qarşı daha sərt mövqe sərgiləyə bilər. Rusiya əvvəllər də oxşar üsullardan istifadə edib. Ötən ilin dekabrında Qroznuda baş verən faciəni unutmamalıyıq. Həmin vaxt Azərbaycan Hava Yollarına məxsus təyyarənin GPS sistemi jamming nəticəsində sıradan çıxmış və qəza ilə nəticələnmişdi".
Politoloq vurğulayır ki, Plovdiv hadisəsi Avropa-Rusiya münasibətlərinə mütləq təsir göstərəcək: "Onsuz da münasibətlər aşağı səviyyədədir. İndi isə bu cür sübutlar ortaya çıxarsa, İttifaq Rusiyaya qarşı daha sərt addımlar ata bilər. Amma bu addımların Rusiya-Ukrayna müharibəsi kontekstində effektivliyi hələlik sual altındadır. Çünki İttifaq daxilində də fikir ayrılıqları var. Məsələn, Ukraynaya sülhməramlı kontingentin yerləşdirilməsi müzakirə olunur, amma buna qarşı çıxan üzv ölkələr də mövcuddur.”
Onun fikrincə, bütün hallarda gərginlik artacaq və bu prosesdə itirən tərəf ilk növbədə Rusiya olacaq: “Avropa uzun illər Rusiya üçün böyük bazar idi. İndi isə Rusiya məcbur olub Çin, Yaxın və Orta Şərq, Afrika istiqamətinə yönəlsin. Bu isə Rusiya iqtisadiyyatına mənfi təsir göstərir. Gözləniləndir ki, Rusiya-Avropa İttifaqı münasibətləri daha da dərin böhrana girəcək".
Mehriban Yariyeva
15:44 02.09.2025
Oxunuş sayı: 2073
