"Qarabağ Azərbaycan iqtisadiyyatının inkişafında yeni mühüm amilə çevrilir" - Deputat
Prezident İlham Əliyevin Kəlbəcərə səfəri baş tutub. Bu səfər çərçivəsində prezident yaşayış kompleksinin və şəhər parkının təməlini qoyub. Bu işğaldan azad olunmuş ərazilərə dövlətin göstərdiyi xüsusi diqqət və qayğının daha bir nümunəsidir.
Mövzu ilə bağlı Milli Məclisin deputatı Vüqar Bayramov Crossmedia.az-a açıqlama verib.
Vüqar Bayramovun sözlərinə görülən işlərin keçmiş məcburi köçkünlərin tezliklə yurdlarına qayıdışını təmin etməsindən danışaraq başlayıb: "İşğaldan azad olunmuş ərazilərdə intensiv bərpa və yenidənqurma işləri həyata keçirilir. Prezident İlham Əliyevin Kəlbəcərə səfəri, yaşayış kompleksinin və şəhər parkının təməlinin qoyulması da onu göstərir ki, Qarabağ və Şərqi Zəngəzur artıq yeni mərhələyə – bərpa, yenidənqurma və inkişaf mərhələsinə qədəm qoyub. Bu proses daha qısa zamanda keçmiş məcburi köçkünlərin öz ata-baba yurdlarına qayıdışını təmin edir".
Deputat azad olunmuş ərazilərdə bərpa və məskunlaşmanın Azərbaycanın gücünü və iradəsini göstərdiyini qeyd edib: "Hazırda işğaldan azad olunmuş ərazilərdə 50 mindən artıq vətəndaş çalışır. Onların 15 mindən çoxu artıq daimi məskunlaşmış keçmiş məcburi köçkünlərdir. Növbəti mərhələnin sonuna qədər 140 mindən artıq vətəndaşımızın Qarabağ və Şərqi Zəngəzurda məskunlaşaraq işləməsi gözlənilir. Bu, Vətən müharibəsindən cəmi qısa müddət sonra Azərbaycanın yalnız daxili maliyyə resursları hesabına genişmiqyaslı quruculuq işlərini həyata keçirməsinin bariz nümunəsidir".
V.Bayramov bildirib ki, Qarabağ Azərbaycanın gələcək iqtisadi gücünün əsas dayaqlarından birinə çevrilir: "Bərpa və yenidənqurma prosesi davam edir və bu, eyni zamanda Qarabağın Azərbaycan iqtisadiyyatının inkişafında yeni mühüm amilə çevrilməsi deməkdir. Bugün həyata keçirilən layihələr təkcə ərazilərin abadlaşdırılmasına yox, həm də milli iqtisadiyyatın inkişafına, yeni dəyərin formalaşmasına və Azərbaycanın gələcək iqtisadi gücünə töhfə verəcək".
Fatimə Nəbiyeva
12:01 22.08.2025
Oxunuş sayı: 893
