Bəh- bəhlə yediyimiz dönərlərin fəsadları: "Küçə dönərxanalarının bir çoxunda..."
Şəmkirdə qidadan kütləvi zəhərlənmə baş verib.
Rayon ərazisində 24 nəfərə yaxın şəxs qida zəhərlənməsi diaqnozu ilə xəstəxanaya yerləşdirilib. Onların dönərdən zəhərləndiyi ehtimal edilir. Məlumata görə, onlardan 14- ü azyaşlıdır. Bu, ilk belə hal deyil. Əvvəllər də dəfələrlə dönərdən zəhərlənmə halları ilə rastlaşmışıq. Bu, onu göstərir ki, dönər heç də çoxlarınıb düşündüyü kimi sağlam qida deyil. Məsələ barədə qida eksperti Fərid Səfərov Crossmedia.az-a danışıb.
Onun sözlərinə görə, yay aylarında qida zəhərlənmələrinin əsas səbəblərindən biri məhz dönər, kabab, salat kimi tez xarab olan qidalar olur: "Yayda isti hava (30°+C) bakteriyaların (xüsusilə Salmonella, E.coli) sürətlə çoxalmasına səbəb olur. Ət, sous, tərəvəz otaq temperaturunda qaldıqda risk qat-qat artır. Dönərdə istifadə olunan ətin mənşəyi və necə saxlanılması çox vacibdir. Donmuş ət bir neçə dəfə əridilib-dondurularsa, mikroblar artır. Mayonez, qatıq, sarımsaq sousları isti havada çox tez xarab olur. Çox vaxt onlar günlərlə eyni qabda saxlanılır. Küçə dönərxanalarının bir çoxunda soyuducu və gigiyena qaydaları normal səviyyədə deyil".
F.Səfərov insanların dönər yeyərkən məkan seçiminə, ətin bişmə səviyyəsinə, saxlama şəraitinə xüsusilə də satıcının gigiyenasına diqqət yetirməli olduqlarını bildirib: "Tanınmış, müştərisi çox olan və təmiz görünən yerləri seçin. Küçənin kənarında toz-duman içində satılan yeməklərdən uzaq durun. Ətin tam bişdiyindən əmin olmaq mütləqdir. Çiy və ya yarımçıq bişmiş ət qida zəhərlənməsinin əsas səbəbidir. Bundan əlavə souslar, salatlar və içkilər soyuducuda saxlanılmalıdır. Açıq havada saatlarla qalmış məhsullar təhlükəlidir. Souslardan uzaq durmaq daha məqsədəuyğun olar. Yayda mayonezli, qatıq əsaslı souslar tez xarab olur. Onları minimuma endirmək və ya tamamilə imtina etmək daha yaxşı olar. Ətdən fərqli iy gəlirsə, sous acıdırsa, tərəvəz solubsa - yemək olmaz. Satıcının gigiyenasına da xüsusi diqqət lazımdır. Belə ki, əlcək, önlük, təmiz mətbəx ləvazimatları olması mütləqdir. Satıcı gigiyenaya əməl etmirsə, oradan yemək olmaz. Əlavə olaraq yemək vaxtını da nizama salmaq məsləhətlidir. Günorta saatlarında təzə bişən yeməklərə üstünlük vermək, axşam qalan və ya ertəsi gün satılan yeməklər təhlükəlidir. Yeməyin gigiyenik kağız və ya təmiz qabda verilməsinə fikir verin. Çirkli səthlə təmas riski artırır. Ən önəmlisi isə yemək yeməzdən əvvəl və sonra əllərinizi yaxşıca yuyun".
Qida eksperti qeyd edib ki yayda mayonezli və qatıq əsaslı souslardan uzaq durmaq vacibdir: "Yayda, xüsusilə iyul-avqust aylarında dönərdən, mayonezli və qatıq əsaslı souslardan uzaq durmaq, daha çox evdə hazırlanmış yeməklərə üstünlük vermək sağlamlıq üçün daha doğrudur. Restoran və dönərxanaların da qida təhlükəsizliyinə ciddi nəzarət etməsi vacibdir. Sağlam qidalanaraq sağlam yaşayaq".
Fatimə Nəbiyeva
16:18 21.08.2025
Oxunuş sayı: 6273
