Ağ Evdə on gün fərqlə keçirilən iki görüş: Trampın Azərbaycana və Avropaya münasibətinin təzahürü
Avqustun 18-də ABŞ-nin paytaxtı Vaşinqtonda Prezident Donald Trampın qəbulunda çəkilmiş fotonun sosial şəbəkələrdə geniş müzakirələrə səbəb olması da təsadüfi deyil.
Fotoda Avropa liderləri, o cümlədən Fransa prezidenti Emmanuel Makron, İtaliyanın Baş naziri Ciorcia Meloni, Avropa Komissiyasının sədri Ursula fon der Lyayen, Almaniya kansleri Fridrix Merts, Finlandiya Prezidenti Aleksandr Stubb, hətta NATO-nun Baş katibi Mark Rutte də Donald Trampın qarşısında, bir cərgədə oturub diqqətlə Ağ Ev rəhbərinə qulaq asırlar. Sanki müəllim dəcəllik etmiş şagirdləri sıraya düzüb danlayır.
Sadə avropalılar, jurnalistlər və ictimai fəallar bu mənzərəni haqlı olaraq “Avropa gücünün çöküşü”, “Trampın Avropa liderlərinə dərsi” kimi dəyərləndirir və məyusluqlarını gizlətmirlər.
Halbuki cəmi on gün əvvəl Ağ Ev rəhbəri Azərbaycan lideri İlham Əliyevlə tamamilə fərqli görüşmüşdü. Liderlər yanaşı oturmuş, müzakirə aparmışdılar. Bu, əslində Ağ Ev - in həm də Azərbaycana və Avropaya münasivətinin, daha dəqiq desək, Azərbaycan və Avropanın hazırkı gücünə, beynəlxalq aləmdəki hörmətinə göstərilən ehtiramın təzahürü idi.
Bu barədə Crossmedia.az-a danışan Milli Məclisin deputatı Tural Gəncəliyev bildirib ki, Trampın son görüşləri və protokol qaydaları, həmçinin qəbul etdiyi xüsusiyyətlər, dünya liderlərini, xüsusilə Avropa ölkələrinin liderlərini ABŞ prezidentinin qarşısında otuzdurması, yayılan fotolar və videolar böyük müzakirələrə və suallara səbəb olmuşdur.
Deputat qeyd edib ki, müqayisə üçün Azərbaycan lideri ilə keçirilən görüşdə göstərilən hörmət diqqət çəkir. “Bu protokol görüşündə olan bütün məqamlar, aspektlər və elementlər təsadüfi deyil. Beynəlxalq münasibətlərdə hər detal – simvolik rəmzi aspektlərdən görüş zamanı edilən hərəkətlərə qədər – böyük əhəmiyyət daşıyır. Azərbaycan lideri ilə görüşdə Trampın bərabərhüquqlu tərəfdaş kimi davranması və göstərilən hörmət ölkəmizin və liderimizin dünyadakı rolunu, dəyərini və gücünü açıq şəkildə göstərir".
Deputatın sözlərinə görə, Avropa İttifaqının liderləri ilə Tramp arasında protokol münasibətləri ilə müqayisədə, Azərbaycana göstərilən hörmətin səviyyəsi daha aydın görünür. “Hazırda Azərbaycan qlobal siyasət aparır və nəticələrini artıq görmək mümkündür. 44 günlük müharibənin başa çatması və Azərbaycanın qalib gəlməsi ölkəmizi dünya siyasətində xüsusi rol oynayan bir dövlətə çevirmişdir. Azərbaycanın güclü liderliyi, davamlı siyasəti, strateji planlaması və dünya gücləri ilə düzgün münasibətləri onu Avrasiya regionunda lider ölkəyə çevirir. “Böyük Avrasiya regionunda hərbi, təhlükəsizlik, siyasi və iqtisadi məsələlər Azərbaycanın liderinin qərarı olmadan həll edilmir. Strateji mövqeyimiz bu ölkəyə münasibətdə heç bir güc mərkəzinin hədə-qorxu ilə danışa bilməyəcəyini göstərir".
Deputatın fikrincə, həm ABŞ, həm Avropa İttifaqı, həm də Avrasiya regionundakı güc mərkəzləri Azərbaycana və onun liderinə hörmətlə yanaşır. “Müharibəni qazandıqdan sonra Azərbaycanın qlobal siyasətə töhfəsi və əldə etdiyi yeni strateji dərinlik ölkəmizə imkan verir ki, dünya səviyyəsində beynəlxalq siyasi, təhlükəsizlik və hərbi gündəliyin formalaşmasında iştirak etsin və bilavasitə dünya siyasətinin aparıcı faktorlarından biri olsun".
Mehriban Yariyeva
12:20 21.08.2025
Oxunuş sayı: 1129
