Azərbaycan Ordusunun rabitə ixtisaslı zabitləri ilə təlim-metodiki toplanış keçirilib
Cari ilin hazırlıq planına əsasən, Azərbaycan Ordusunun qoşun növü, birlik, birləşmə və hərbi hissələrinin, həmçinin Milli Müdafiə Universitetinin tabeliyində fəaliyyət göstərən xüsusi təyinatlı təhsil müəssisələrinin rabitə ixtisaslı zabitlərinin iştirakı ilə təlim-metodiki toplanış keçirilib.
Crossmedia.az xəbər verir ki, bu barədə Müdafiə Nazirliyi məlumat
yayıb.
Məlumata görə Azərbaycan Ordusunda rabitə hissə və bölmələrinin
fəaliyyətinin, qoşunlar arasında vahid rabitə və idarəetmə sistemlərinin
işinin, həmçinin rabitə ixtisaslı zabitlərin peşə hazırlıqlarının yüksəldilməsi
məqsədilə keçirilən toplanışda rabitə sahəsində mövcud olan yeniliklər barədə
iştirakçılar məlumatlandırılıb.
Təlim-metodiki toplanış çərçivəsində müxtəlif tipli müasir
radiostansiyaların imkan və qabiliyyətləri, radiokommunikasiya sistemində tətbiqi
və inkişaf perspektivləri, peyk rabitəsinin və kommunikasiya fəaliyyətinin təşkili
mövzusunda təqdimatlar verilib.
Qoşunlarda istismara yeni qəbul edilmiş idarəetmə sistemləri,
rabitə qurğuları, radiostansiyalar, rəqəmsal texnologiya, müasir məlumatötürmə
proqramlarının inkişaf istiqamətləri, kibertəhlükəsizliyin təşkili və
kibergigiyena qaydaları haqqında nümayiş olunan təqdimatlar ixtisasçı zabitlər
tərəfindən maraqla qarşılanıb.
Sonda iştirakçıları maraqlandıran suallar cavablandırılıb,
praktik tövsiyələr verilib.
19:16 14.08.2025
Oxunuş sayı: 6854
