Bakının humanist siysəti: Azərbaycan Ukraynaya humanitar yardımı davam etdirir - Deputat
"Azərbaycan həm ikitərəfli, həm də çoxtərəfli formatda bu iki dost ölkənin daim bir-birini dəstəkləməsinə önəm verib. Ötən dövr ərzində Ukrayna, beynəlxalq təşkilatlarda, dünyada mövcud olan ikili standartlara və Azərbaycanın işğal altında olmasına baxmayaraq, hər zaman ölkəmizin ərazi bütövlüyünü dəstəkləyib, Qarabağı Azərbaycanın ərazi bütövlüyü çərçivəsində tanıyıb. Eyni münasibəti Azərbaycan da hər zaman Ukraynaya göstərib və Rusiya–Ukrayna müharibəsi başlayanda da Ukraynanın ərazi bütövlüyünə dəstəyini ifadə edib".
Bu sözləri Azərbaycanın Ukraynaya davam edən humanitar yardımı barədə Crossmedia.az-a danışan Milli Məclisin deputatı Məlahət İbrahimqızı deyib.
Deputat qeyd edib ki, ən çətin məqamlarda belə, Azərbaycan Prezidenti beynəlxalq təşkilatlarda Ukraynanın ərazi bütövlüyünü tanıdığımızı bəyan edib: "Ötən illər ərzində Azərbaycan Ukraynaya davamlı şəkildə humanitar yardım göstərib. Azərbaycan hər zaman Ukraynanın çətin vaxtlarında yanında olub. Ümumiyyətlə, Azərbaycan təkcə Ukraynaya deyil, dünyanın müxtəlif bölgələrində humanitar yardım göstərən öncül ölkələrdən biridir. Afrika qitəsində, inkişaf etməkdə olan ölkələrdə, ada dövlətlərində və yeni inkişaf edən regionlarda daim dəstəyini göstərib. COVİD-19 pandemiyası dövründə 100-ə yaxın ölkəyə müxtəlif formalarda humanitar yardım edilib. Yaxın günlərdə isə Prezidentimiz tərəfindən Ukraynaya 2 milyon ABŞ dolları məbləğində yardım ayrılıb. Ümumiyyətlə, Azərbaycanın beynəlxalq müstəvidə etibarlı tərəfdaş kimi mövqeyi var".
M.İbrahimqızı həmçinin prezidentimizin xarici siyasətinin öndəgedən olması ilə bağlı fikirlərini bölüşüb: "Ölkə lideri İlham Əliyevin xarici siyasətinin əsas prinsiplərindən biri düşmənçilik elementlərinin olmamasıdır. Əksinə, münasibətlərin dostluq əsasında qurulması və digər ölkələrlə əməkdaşlıq hər zaman əsas hədəf olub. Tarix boyu Azərbaycan ərazilərinə düşmən gözü ilə baxan və işğal siyasəti həyata keçirən Ermənistan 200 ilə yaxın müddətdə torpaqlarımızı işğal altında saxlayıb. Qələbə zəfərindən bir il keçməmiş, möhtərəm Prezidentimiz bütün dünyaya, eləcə də Ermənistan rəhbərliyinə bildirdi ki, bölgədə yeni səhifə açılır. Bu səhifənin adı barış və davamlı inkişafdır. İlk sülh təklifini də Prezidentimiz irəli sürdü. Ermənistan–Azərbaycan münasibətlərinin normallaşması və sülh sazişi ilə bağlı sənədin demək olar ki, bütün maddələri Prezidentimizin təşəbbüsü ilə formalaşıb. Bu mənada Azərbaycan Ukraynanın hazırda keçdiyi ağır mərhələdə humanitar yardımını növbəti dəfə göstərdi. Bu fakt Azərbaycan dövlətinin siyasətində və Prezidentimizin apardığı kursun təməlində humanizmin nə qədər böyük əhəmiyyət daşıdığını bir daha sübut edir".
Fatimə Məmmədova
15:47 14.08.2025
Oxunuş sayı: 884
