Gündəm

Paşinyan ABŞ, Azərbaycan və Ermənistan arasında imzalanan deklarasiyanın əhəmiyyətindən danışıb

Ermənistan Baş naziri Nikol Paşinyan müsahibəsində Ermənistan, Azərbaycan və ABŞ arasında Vaşinqtonda imzalanan deklarasiyanın yalnız ikitərəfli deyil, həm də regional və beynəlxalq səviyyədə böyük əhəmiyyət daşıdığını vurğulayıb.

“Düşünürəm ki, dünənki deklarasiya həm İran, həm də Rusiya üçün əhəmiyyətli faydalar gətirə bilər. Məsələn, bu həyata keçiriləndə İranın Fars körfəzindən Qara dənizə dəmir yolu ilə çıxış imkanı yaranacaq, Rusiya və İran arasında isə dəmir yolu əlaqəsi mümkün olacaq,” — deyə Baş nazir bildirib.

Crossmedia.az xarici mətbuata istinadən xəbər verir ki, o, qeyd edib ki, razılaşmanın həyata keçirilməsi yalnız iştirakçı ölkələr üçün deyil, iqtisadi faydalar baxımından geniş miqyaslı səmərəlilik təmin edəcək: “Əgər biz bu razılaşmanın iqtisadi tərəfinə diqqət yetirsək, əhəmiyyətli və konkret faydalar yalnız Ermənistan, Azərbaycan və ABŞ üçün deyil, həmçinin Türkiyə, Rusiya və İran üçün də təmin olunacaq".

Paşinyan diqqətə çatdırıb ki, bu cür dəmir yolu əlaqəsi region üçün misilsiz olacaq.

“Faktiki olaraq, belə bir əlaqə misilsiz olar, çünki hazırda Cənubi Qafqazda İranı və Rusiyanı birləşdirən dəmir yolu mövcud deyil,” — deyə Baş nazir bildirib.

Ermənistan Baş naziri həmçinin yeni razılaşmanın beynəlxalq sabitlik və təhlükəsizlik baxımından əhəmiyyətini vurğulayıb.

“Bu, çox önəmli razılaşmadır və bütün ölkələr üçün, həmçinin beynəlxalq ictimaiyyət üçün, o cümlədən beynəlxalq sabitlik və təhlükəsizlik baxımından böyük fayda gətirə bilər,” — deyə Paşinyan əlavə edib.

O, Ermənistanın gərginliyi artırmaq və münaqişələri provokasiya etmək niyyətində olmadığını da qeyd edib: “Biz münaqişələri, gərginliyi provokasiya etmək istəmirik. Məqsədimiz sabitlik, sülh, dayanıqlı inkişaf, iqtisadi və siyasi əməkdaşlıq təmin etməkdir. Düşünürəm ki, dünənki deklarasiya bunun üçün çox vacib və əlverişli platformadır".