"Kərəm Vəliyevin Pakistana səfərini əməkdaşlığın inkişaf etdirilməsində növbəti bir addım kimi dəyərləndirə bilərik" - Ekspert
Azərbaycan Ordusunun Baş Qərargah rəisi, general-polkovnik Kərim Vəliyev Pakistan Quru Qoşunları komandanı feldmarşal Asim Munirin dəvəti ilə İslamabada səfər edib. Səfər çərçivəsində iki ölkə Müdafiə nazirlikləri arasında əməkdaşlıq müzakirə olunub, Asim Munirə “Hərbi əməkdaşlıq sahəsində xidmətlərə görə” medalı təqdim edilib. Kərim Vəliyev Pakistanın “Müstəqillik günü” və “Haqqın qələbəsi”nə həsr olunan hərbi paradda iştirak edəcək.
Bu səfər Azərbaycan və Pakistan arasında hərbi əməkdaşlığın strateji səviyyədə davam etdiyini göstərir. Medal təqdimatı isə tərəflər arasında qarşılıqlı etimad və dostluğun rəmzi kimi qiymətləndirilə bilər. İslamabaddakı hərbi paradda iştirak, ikitərəfli münasibətlərin həm rəsmi, həm də simvolik gücünü nümayiş etdirir.
Mövzu ilə bağlı hərbi ekspert Ədalət Verdiyev Crossmedia.az-a açıqlama verib.
O, bu görüşün Azərbaycan-Pakistan əməkdaşlığının inkişafı üçün ilk addım olmadığını bildirib: “Azərbaycan ilə Pakistan arasında bütün sahələrdə, o cümlədən hərbi, hərbi-texniki sahədə əməkdaşlıq kifayət qədər qədimdir. Ona görə də Azərbaycan Ordusunun Baş Qərargah rəisi general-polkovnik Kərim Vəliyevin Pakistana növbəti səfərini biz ikitərəfli münasibətlərində yeni bir mərhələnin başlanğıcı kimi deyil, əməkdaşlığın inkişaf etdirilməsində növbəti bir addım kimi dəyərləndirə bilərik”.
Nicat Rüstəmzadə
12:29 14.08.2025
Oxunuş sayı: 24092
