“Dünyanın aparıcı ölkələri Azərbaycanın bu təşəbbüsünə qoşulublar” - Deputat
Azərbaycanın Xarici İşlər naziri Ceyhun Bayramov və Ermənistanın xarici işlər naziri Ararat Mirzoyan arasında telefon danışığı baş tutub. Danışıq zamanı tərəflər Vaşinqton Zirvə görüşündə imzalanmış Birgə Bəyannamənin icrası və etimad quruculuğu tədbirlərini müzakirə ediblər. Nazirlər həmçinin regional məsələlər ətrafında fikir mübadiləsi apararaq birbaşa dialoqun davam etdirilməsinə hazır olduqlarını təsdiqləyiblər.
Mövzu barədə Crossmedia.az-a açıqlama verən Milli Məclisin deputatı Ziyad Səmədzadə bildirib ki, bu addım Azərbaycan və Ermənistan arasında diplomatik əlaqələrin yaranması baxımından mühüm əhəmiyyət daşıyır. “Təbii ki, Amerikada imzalanan tarixi sənəd Azərbaycan-Ermənistan münasibətlərində yeni bir mənzərə yaradıb. Bundan sonra Azərbaycan-Ermənistan münasibətlərinin inkişafına Amerikada qəbul edilmiş bəyanat əsasında münasibət bildiriləcək. Bu istiqamətdə aparılan işlərin müsbət təsir göstərəcəyini əminliklə demək olar”, – deputat vurğulayıb.
Ziyad Səmədzadə əlavə edib ki, artıq dünyanın aparıcı ölkələri, vaxtilə Azərbaycana qarşı mövqedə olanlar da daxil olmaqla, bu təşəbbüsə qoşulublar. “Amerikada Trampın bilavasitə rəhbərliyi ilə bu iki ölkə arasında keçirilən görüş dünya tarixində yeni bir mərhələ açır. Müharibələr dayanır, insanlar ölmür, qarşıdurma azalır. Artıq müəyyənləşdirilmiş sərhədlərin tanınması həyata keçirilməlidir”, – o qeyd edib.
Deputat bildirib ki, iki ölkənin Xarici İşlər Nazirliyinin danışıqları Azərbaycan və Ermənistan arasındakı diplomatik münasibətlərin qurulmasının mühüm bir istiqamətidir. “Təbii ki, Xarici İşlər naziri ölkənin xarici siyasətini həyata keçirən şəxsdir və onun vasitəsilə vaxtilə bizə düşmən sayılan, indi isə hələ də düşmən olan ölkə ilə artıq əməkdaşlıq aparılır ki, aradakı kin və qarşıdurma aradan götürülsün. Çünki bu bəyanatda göstərilən məsələlərin həlli bilavasitə iki nazirlik arasında əməkdaşlığın yeni müstəvidə, yeni tələblərlə həyata keçirilməsini zəruri edir. Mən hesab edirəm ki, bu ilk addımdır”, – Ziyad Səmədzadə əlavə edib.
Deputatın fikrincə, gələcəkdə iki ölkə və iki xalq arasında münasibətlərin yaxşılaşması, sülh şəraitində Cənubi Qafqaz regionunun inkişafı üçün bu kimi sağlam tədbirlər mütləq görülməlidir.
“İstər iqtisadiyyat sahəsində, istər mədəniyyət sahəsində, istər sosial sahədə, milli maraqları və təhlükəsizliyi qorumaq, eləcə də ölkənin iqtisadi müstəqilliyini təmin etmək şəraitində bu həyata keçiriləcəkdir. Bu yaxşı təşəbbüsdür. Əminəm ki, bu təşəbbüs getdikcə sürətlənəcək və bütövlükdə dövlətin digər strukturları ilə əməkdaşlığın genişlənməsinə şərait yaradacaq”, – deputat vurğulayıb.
Mehriban Yariyeva
15:29 13.08.2025
Oxunuş sayı: 1276
