"Gözləntimiz odur ki, Ermənistan konstitusiyasına dəyişikliklər edəcək, ərazi iddialarından əl çəkəcək" - Deputat

Azərbaycan və Ermənistan arasında sülhün və dövlətlərarası münasibətlərin qurulması haqqında Sazişin tam icrasına zəmanət verən və bunun üçün ikitərəfli komissiya təsis edən bir müqavilə paraflanmışdır. Sazişin 14-cü maddəsinə əsasən, tərəflər beynəlxalq hüquq və qarşılıqlı münasibətlərdə bağlayıcı olan müqavilələr üzrə hüquq və öhdəliklərinə xələl gətirmədən, Sazişin təfsiri və tətbiqi ilə bağlı mübahisələri birbaşa məsləhətləşmələr, o cümlədən XIII maddədə qeyd olunan komissiya vasitəsilə həll etməyə çalışacaqlar. Bu məsləhətləşmələr 6 ay ərzində hər iki tərəf üçün qəbul edilə bilən nəticə verməzsə, tərəflər mübahisələrin dinc yolla həllinin digər vasitələrinə müraciət edəcəklər.
Mövzu ilə bağlı Milli Məclisin deputatı Müşfiq Cəfərov Crossmedia.az-a açıqlama verib: “Azərbaycan və Ermənistan arasında sülhün və dövlətlərarası münasibətlərin təsis edilməsi haqqında Sazişin icrası üçün ikitərəfli komissiyalar yaradılması nəzərdə tutulub. Təbii ki, tərəflərin Sazişin tələblərinə riayət etməsi vacibdir. Lakin Ermənistan rəhbərliyi bundan əvvəl bir çox sənədə imza atsa da, demək olar ki, əksəriyyətinə əməl etmədi. Əslində bunun bircə mənası var, o da Ermənistanı beynəlxalq aləmdə təmsil edən rəhbərliyin öz imzasına və sözunə hörmət etməməsi idi. Keçmişə baxsaq, 10 noyabr Bəyannaməsinin 5 ilə yaxın bir müddətində heç bir şərti Ermənistan tərəfindən yerinə yetirilmədi. Sənəd imzalandığı gündən bu günə kimi sadəcə delimitasiya və demarkasiya işlərində qismən irəliləyiş əldə olunub. Lakin hələ də Naxçıvanın Kərki kəndi və Qazaxın üç kəndi geri qaytarılmayıb. Naxçıvanla əlaqə yolunun açılması hələ 10 noyabr 2020-ci il tarixli üçtərəfli bəyanatın 9-cu bəndinin tələblərinə uyğun olaraq dərhal icra edilməli idi. Bununla bağlı Ermənistan üzərinə öhdəlik götürub və bu öhdəlik yerinə yetrilmədi. Gözləntimiz odur ki, Ermənistan konstitusiyasına dəyişikliklər edəcək - Azərbaycana və qardaş Türkiyəyə ərazi iddialarından əl çəkəcək, bir sözlə sənəddə icrasına imza atdığı bütün şərtlərə əməl edəcək”.
Ayhan
18:05 12.08.2025
Oxunuş sayı: 955