Tofiq Zülfüqarov qəzəbləndi: "Bəzi siyasi şərhçilər..." - Rusiya ilə bağlı fərqli yanaşma
Azərbaycan və Ermənistan arasında paraflanmış sülh sazişinin mətni dərc olunub. Mətndə kifayət qədər ciddi məsələlər öz əksini tapıb. Xüsusilə qeyd olunub ki, Azərbaycanla Ermənistan müxtəlif sahələrdə əməkdaşlığın təsis edilməsi üçün razılaşmalar bağlaya bilər. Bundan başqa, bildirilib ki, Azərbaycan və Ermənistan iki ölkə arasında sülhün və dövlətlərarası münasibətlərin təsis olunması haqqında Sazişin tam icrasına zəmanət verirlər və hazırkı Sazişin icrasına nəzarət məqsədilə ikitərəfli komissiya təsis edəcəklər.
Əslində paraflanmış sülh sazişinin mətni kifayət qədər müsbət fikirlər yaradır.
Crossmedia.az-a açıqlama verən keçmiş xarici işlər naziri Tofiq Zülfüqarov isə deyib ki, hələ görülməli çox iş var: "Sülh sazişinin mətni hələ imzalanmayıb. Bunun üçün Ermənistan əvvəlcə özündə Azərbaycana qarşı ərazi iddialarını ehtiva edən konstitusiyasını dəyişdirməlidir. Bu prosesin 2026-cı ildə baş verməsi gözlənilir. Konstitusiyanın dəyişdirilməsi isə ciddi prosedurdur. Referenduma və ictimai diskursa ehtiyac var. Bəlkə də, heç konstitusiya dəyişdirilməyəcək".
Diplomat, həmçinin Rusiya və İranın məsələyə münasibətindən də danışıb: "Orada, burada danışılanlara fikir verməyin. Hər iki tərəf rəsmi səviyyədə Vaşiqton razılaşmasına kifayət qədər normal reaksiya verdi. Nə Tehranın, nə də Moskvanın Zəngəzur dəhlizi ilə bağlı razılıqdan narahat olmalarına əsas yoxdur. Prezident İlham Əliyevin də dediyi kimi, Zəngəzur dəhlizinin açılması həm də şimal - cənub dəhlizinin açılması deməkdir. Artıq yüklər Skandinaviyadan Fars körfəzinə qədər gedə bilcək. Əgər Rusiya dəhlizə nəzarət etmək istəsə idi, bunu ötən beş ildə edərdi. Üstəlik, İrəvan hələ rus sərhədçilərini ərazidən çıxarmayıb. Azərbaycanda heç bir ölkənin qoşunu yoxdur. Əgər Rusiyanın, yaxud İranın nə is razılığı varsa, bunu Ermənistana və ya Ağ Ev rəhbəri Donald Trampa desinlər. Azərbaycanlıq bir şey yoxdur. Bəzi siyasi şərhçilər siyasi konyukturanı əks etdirən bəyanatlar verirlər. Ancaq reallıqlar fərqlidir. Azərbaycan heç kim üçün təhdid yaratmır".
Kənan Novruzov
13:36 12.08.2025
Oxunuş sayı: 1005
