Azərbaycanlı analitikdən Markova cavab: "Rusiya bu şansa lazımı dəyəri verə bilmədisə, buna Azərbaycan nə etsin?"
Avqustun səkkizində Vaşinqtonda ABŞ Prezidenti Donald Trampın iştirakı Azərbaycan Prezidenti İlham Əliyev və Ermənistan baş naziri Nikol Paşinyan arasında əldə olunan razılaşmalar və bununla əlaqədər olaraq Cənubi Qafqaz regionunda yaranan yeni reallıqlar beynəlxalq ictimaiyyətin diqqətinədir. Dünya dövlətlərinin məsələyə reaksiyası müxtəlifdir. Rusiyalı politoloq Sergey Markov bildirib ki, Ermənistan bu razılaşma ilə İran və Rusiyaya xəyanət elədi. Doğrudur, bu, rəsmi mövqe deyil. Hərçənd Kemlin sözçüsü Dmitri Peskovun açıqlamasından o qədər də fərqlənmir.
Siyasi şərhçi Aydın Quliyev Markovun dediklərini Crossmedia.az-a şərh edib: "Ermənistanın xain dövlət olduğunu indi bildilər? Ermənistanın xəyanətini ifşa etmək üçün bura kimi çox sayda məqamlar olub. İndi yadlarına düşdü ki, Ermənistan xəyanətkar dövlətdir? Ermənistan Rusiyaya xəyanət hesab olunan addımı atmayıb da " dost" saydığınız Azərbaycanla əbədi müharibə vəziyyətində qalmalı idi?! Bu fikirlə Azərbaycanın da Rusiyaya xəyanət etdiyinə eyham vurmaq istəyirlər? Qafqaza tam sülh gətirmək üçün Azərbaycanın Rusiyaya Bişkek sazişindən sonra düz 29 il şans verməsi kifayət deyildi? Rusiya bu şansa lazımı dəyəri verə bilmədisə, buna Azərbaycan nə etsin?".
O bildirib ki, Azərbaycan Qafqaza daimi sülh gətirmək məsələsində heç kimi ideallaşdırmır: "Fərqi yoxdur, Rusiyadır, ya ABŞ. Kim bu bölgədə sülh maraqlarına əməli olaraq dəstək verəcəksə, Azərbaycan strateji tərəfdaşlığı onunla quracaq. Strateji tərəfdaşlıq "molla kəbini " deyil ki, əbədi olaraq bir dövləti tutub onun yanında duraq".
Kənan Novruzov
12:20 12.08.2025
Oxunuş sayı: 9827
