Əməyin mühafizəsi sahəsində daha 5 yeni milli standart təsdiq edilib
Əməyin mühafizəsi sahəsində daha 5 yeni milli standart hazırlanaraq təsdiq edilib.
Crossmedia.az xəbər verir ki, Əmək və Əhalinin Sosial Müdafiəsi
Nazirliyi yanında Dövlət Əmək Müfəttişliyi Xidmətinin sədrliyi ilə fəaliyyət
göstərən “Əmək sahəsində” standartlaşdırma (AZSTAND/TK21) üzrə Texniki Komitənin
fəaliyyət planına əsasən əməyin mühafizəsi üzrə 5 milli standart hazırlanaraq
Azərbaycan Standartlaşdırma İnstitutu tərəfindən dövlət standartı kimi təsdiq
edilib.
Beynəlxalq Əmək Təşkilatının “Əməyin Təhlükəsizliyi və
Gigiyenası haqqında” 155 nömrəli Konvensiyasının tələblərinə uyğun hazırlanan
standartlar:
Fərdi mühafizə vasitələrinin sınaq proseduru
Gözlərin və üzün mühafizəsi
Qoruyucu geyim
Qoruyucu ayaqqabı
Fərdi mühafizə vasitələrinin təhlükəsizliyinə dair tələbləri
əhatə edir.
İşçilərə xüsusi geyim, xüsusi ayaqqabı və digər fərdi
mühafizə vasitələrinin verilməsi zamanı yeni standartların tələblərinə uyğun təşkil
olunması, əməyin mühafizəsi qaydalarının təkmilləşdirilməsi, qüvvədə olan
normalara və beynəlxalq təcrübəyə uyğunlaşdırılması istiqamətində mühim önəm kəsb
edir.
Əmək və Əhalinin Sosial Müdafiəsi Nazirliyi yanında Dövlət
Əmək Müfəttişliyi Xidməti ilə yanaşı, Fövqəladə Hallar Nazirliyi, Dövlət Neft
Şirkəti (SOCAR), Kiçik və Orta Biznesin İnkişafı Agentliyi (KOBİA), Sahibkarlar
(İşəgötürənlər) Təşkilatları Milli Konfederasiyası və Həmkarlar İttifaqları
Konfederasiyasının təmsil olunduğu Texniki Komitə tərəfindən əmək sahəsi üzrə
standartların hazırlanması istiqamətində işlər davam etdirilir.
10:31 12.08.2025
Oxunuş sayı: 5275
