"Vaşinqtonda əldə edilən razılaşma Azərbaycanın artan gücünün, siyasi nüfuzunun və beynəlxalq müstəvidə qazandığı etimadın parlaq göstəricisidir" - RƏY
Prezident İlham Əliyevin ABŞ Prezidenti Donald Trampın dəvəti ilə Vaşinqtona etdiyi səfər Azərbaycanın diplomatik uğurlarının zirvəsi kimi qiymətləndirilə bilər və bu regionda davamlı sülhün təmin olunmasında mühüm addımdır. Bu səfər, Əliyevin qətiyyətli liderliyi və strateji siyasəti nəticəsində Cənubi Qafqazı yeni müharibələrdən qorumaq və sülhü bərqərar etmək istiqamətində atılmış əhəmiyyətli bir addımdır. Vaşinqton görüşü, Azərbaycan-Ermənistan sülh prosesini sürətləndirərək regionda sabitlik və əməkdaşlıq üçün yeni imkanlar yaratmış, eyni zamanda Azərbaycan-ABŞ münasibətlərini strateji tərəfdaşlıq səviyyəsinə yüksəldib.
Prezident İlham Əliyevin ABŞ-ə səfəri ilə bağlı Milli Məclisin deputatı Günay Ağamalı Crossmedia.az-a açıqlama verib: "Avqustun səkkizində keçirilən Vaşinqton görüşü Cənab Prezident İlham Əliyevin illərdir həyata keçirdiyi ardıcıl, prinsipial və milli maraqlara əsaslanan siyasətinin məntiqi nəticəsidir. Bu görüşlə regionumuzda uzun illər davam edən gərginlik sona çatdı, yeni bir mərhələyə keçid edildi, müharibə təhlükəsi aradan qaldırıldı və sülhün təməli qoyuldu. Vaşinqton görüşü Azərbaycan və Ermənistan arasında münasibətlərin normallaşması ilə yanaşı, Birləşmiş Ştatlarla ölkəmizin ikitərəfli münasibətlərində yeni bir mərhələnin başlanğıcı oldu. Xüsusilə, 907-ci düzəlişin ləğvi Bakı-Vaşinqton xəttində strateji yaxınlaşmaya, müdafiə və təhlükəsizlik sahəsində əməkdaşlığı dərinləşdirməyə münbit zəmin formalaşdırdı".
Parlamentari söyləyib ki, ölkə başçısı Cənab İlham Əliyevin qətiyyətli liderliyi, beynəlxalq hüquqa söykənən mövqeyi, hər addımında milli maraqları üstün tutan strategiyası və praqmatik diplomatiyası sayəsində Azərbaycan suverenliyini və ərazi bütövlüyünü tam bərpa etdikdən sonra regionu davamlı əməkdaşlıq və inkişaf perspektivinə çıxardı: "Vaşinqtonda əldə edilən razılaşma Azərbaycanın artan gücünün, siyasi nüfuzunun və beynəlxalq müstəvidə qazandığı etimadın parlaq göstəricisidir. Bu tarixi nailiyyət hər bir Azərbaycanlının qürur mənbəyidir. Biz güclü liderlik, milli birlik, dövlətin prinsipial mövqeyi və xalqın dəmir iradəsi ilə gələcək nəsillərə müharibəsiz, təhlükəsiz, inkişaf və rifahla dolu bir region bəxş etmək gücünə malikik. Dövlət başçımızın qətiyyətli addımı tarixə düşən siyasi uğur və regionun taleyini dəyişdirən strateji dönüş nöqtəsidir”.
Ayhan
13:13 11.08.2025
Oxunuş sayı: 7441
