Azərbaycan Ukraynanın ərazi bütövlüyünü dəstəkləyir və bunu bizə heç kim qadağan edə bilməz – AÇIQLAMA
ABŞ vasitəsilə Azərbaycan-Ermənistan arasında sülh müqaviləsinin imzalanması üçün ilk addım atıldı. Bəzi xarici və daxili qüvvələrin hələ də qəbullana bilmədiyi Zəngəzur dəhlizi reallaşdı. Bu addım təbii ki, bir çox dünya ölkələri tərəfindən alqışlandı. Əlbəttə bu təqdirəlayiq addım Rusiya-Ukrayna müharibəsinə bir ismarıc oldu. Bu addım Rusiya-Ukrayna müharibəsində də sülhün mümkün olduğuna bir daha işarə etdi. Ölkəmizin isə bu savaşda göstərdiyi mövqə əlbəttə alqışlanmalı haldır. Lakin bu mövqeni bəzi qüvvələr hələ də həzm etməməkdədir. Hətta bəzi qaragüruhçular Azərbaycanın məhz ABŞ-a görə Ukraynaya hərbi yardım edəcəyini istisna etmir. Unutmaq olmaz ki, Azərbaycanın etdiyi yardımlar hərbi yardımdan daha önəmli olub və 4 ildir ki, davam edir. Bunun ən bariz sübutunu ölkəmizin Ukraynaya neft-qaz və humanitar yardımlar göstərməsini qeyd edə bilərik. Təbii ki, Azərbaycanın bu siyasətinə heç kəs müdaxilə və ya təsir edə bilməz.
Məsələ ilə bağlı Crossmedia.az-a açıqlama verən hərbi ekpert Üzeyir Cəfərov ,həqiqətən də, bəzi qüvvələrin Ermənistanı bizə qarşı qoymazsa artıq müharibənin olmayacağını qeyd edib.
“Azərbaycanın ABŞ-da Ermənistanla imzaladığı anlaşma, sülh sazişinin bəndləri yaxın müddətdə, yəni bu gün axşam saatlarında tam açıqlanacaq. Bu isə o deməkdir ki, Azərbaycan Ermənistan ilə bəzi qüvvələrin başımıza gətirdiyi oyunlara son qoyur. Bundan sonra Ermənistan rəhbərliyinin də qeyd etdiyi kimi, bölgədə hər hansısa bir müharibənin olması mümkün deyil və Ermənistan sülhə əməl edərsə müharibə olmayacaq”.
Hərbi ekspert həmçinin Azərbaycanın Ukraynaya yardımının artıq 4 ildir davam etdiyini və bu yardımın hərtərəfli olduğunu qeyd edib.
“Azərbaycan Amerikaya görə Ukraynaya hərbi yardım etməsi məsələsinə gəldikdə isə düşünürəm ki, Azərbaycan Ukraynaya hrətərfli yardım edir. Ölkəmiz ilk gündən Ukraynanın ərazi bütövlüyünü dəstəkləyir və bu gün də dəstək davam edir. Burda mütləq deyil hərbi yardım edilsin. Bildiyimiz kimi Azərbaycan Dövlət Neft Şirkəti (SOCAR) Ukraynaya artıq dördüncü ildir ki hərtərəfli yardım edir və hesab edirəm ki, bu Ukrayna xalqı üçün hərbi yardımdan da önəmlidir. Düzdür son vaxtlar bizim şimal qonşumuz və bəziləri Ukrayna ilə əlaqələrə görə qıcıqlanırlar, amma buna qıcıqlanmaq deyil normal yanaşmaq lazımdır. Bu ikitərəfli Azərbaycan-Ukrayna əlaqələridir və dünən Azərbaycan Prezidenti ilə Ukrayna Prezidenti arasında telefon danışığı oldu və hər iki tərəf Rusiyanın mülki infrastruktur olan SOCAR-ın qaz ötürücü, qaz paylayan stansiyasını vurmasını pisləyir və Rusiyanı bu cür addımlardan çəkinməyə çağırıblar. Bir sözlə Azərbaycan Ukraynanın yanındadır, onun ərazi bütövlüyünü dəstəkləyir və bunu Azərbaycana heç kim qadağa edə bilməz”- deyə ekspert bildirib.
Elmir Heydərli
12:47 11.08.2025
Oxunuş sayı: 2472
