Deputat: “Sülh müqaviləsinin imzalanması Azərbaycanla Ermənistan arasındakı düşmənçilik münasibətlərinə son qoyacaq”
Azərbaycan Respublikasının Prezidenti İlham Əliyev Vaşinqtonda jurnalistlərə verdiyi müsahibədə bir çox mühüm məqamlara toxunub. Prezident bildirib ki, Azərbaycan daha güclü tranzit ölkəyə çevrilmək məqsədi daşıyır və bu istiqamətdə Zəngəzur dəhlizinin açılması kimi öhdəliyi öz üzərinə götürə bilər. Azərbaycanın tarixən İpək Yolu kimi zəngin tranzit təcrübəsi bu missiyanı dəstəkləyir.
Bu barədə Crossmedia.az-a danışan Milli Məclisin deputatı Anar İsgəndərov deyib ki, Prezident İlham Əliyevin Ağ Evdə yüksək səviyyədə qarşılanması, ABŞ Prezidenti Donald Trampın ona göstərdiyi xüsusi diqqət və sülh müqaviləsinin paraflanmasının Vaşinqtonda həyata keçirilməsi Azərbaycanın qalib dövlət olduğunu təsdiqləyir: “Bu qələbəni dünyanın aparıcı dövlətləri də qəbul edir. Vaxtilə ATƏT-in Minsk Qrupunun həmsədri olan bəzi dövlətlər Azərbaycanın haqqını etiraf etməkdə çətinlik çəksələr də, bu gün ABŞ bu müqavilənin öz ərazisində paraflanmasını böyük qürur hesab edir. Sülh müqaviləsinin imzalanması Azərbaycanla Ermənistan arasındakı düşmənçilik münasibətlərinə son qoyacaq və Zəngəzur dəhlizində Azərbaycanın iki hissəsi arasında normal əlaqələrin qurulmasına imkan yaradacaq. Bu, Azərbaycanı mühüm tranzit ölkəsinə çevirir. Avropadan Şərqə, Şərqdən isə Avropaya yüklərin daşınmasında Azərbaycan əhəmiyyətli rol oynayır. Tarixən İpək Yolunun Azərbaycandan keçməsi və bu sahədəki təcrübəmiz ölkəmizin bu missiyanı uğurla yerinə yetirməsinə imkan verir. Azərbaycan beynəlxalq nüfuzunu günü-gündən artırır və artıq yalnız regional dövlət kimi deyil, dünyanın inkişaf etmiş ölkələrindən biri kimi diqqət mərkəzindədir. Bu gün Azərbaycan NATO-ya üzv 10 ölkəyə və Suriyaya qaz ixrac edirsə, bu, onun təkcə Cənubi Qafqazda deyil, dünya miqyasında maraq doğuran güclü dövlət olduğunu göstərir. Azərbaycanın son illərdə apardığı siyasət, əhalisinin və ərazisinin nisbətən kiçik olmasına baxmayaraq, dünyanın ən güclü dövlətləri ilə uğurlu əməkdaşlıq qurduğunu və Prezident İlham Əliyevin böyük beynəlxalq nüfuza malik olduğunu sübut edir.”
Ayhan
17:42 10.08.2025
Oxunuş sayı: 778
