"İlham Əliyevin Ağ Evdəki məğrur duruşu və nitqi bir daha sübut etdi ki, o, dünya miqyaslı liderdir" - Rəy
Azərbaycan Prezidenti İlham Əliyev ABŞ-ə səfəri çərçivəsində bir çox mühüm məsələlərin həlli istiqamətində danışıqlar aparıb. Avqustun 8-də Vaşinqtonda Prezident İlham Əliyev və ABŞ Prezidenti Donald Tramp Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyasının hazırlanması məqsədilə Strateji İşçi Qrupunun yaradılması haqqında Anlaşma Memorandumu imzalayıblar.
Milli Məclisin deputatı Ziyad Səmədzadə memorandumun əhəmiyyəti ilə bağlı fikirlərini Crossmedia.az-la bölüşüb:
“Bu memorandum həm Azərbaycan, həm də Ermənistan üçün tarixi əhəmiyyət kəsb edən sənəddir. İki dövlət və xalq arasında əsrlər boyu davam edən münaqişənin həlli yolunda atılmış ən mühüm addımlardan biridir. Azərbaycan dövlətinin və xalqının apardığı uğurlu siyasət, ölkəmizin Cənubi Qafqazın lideri olması və dövlət siyasətinin effektivliyi Azərbaycanın haqq səsinin bütün dünya tərəfindən qəbul edildiyini sübut etdi. Erməni faşizmi üzərində qələbədən sonra bəzi erməni dairələri və onların havadarları sülh müqaviləsinin imzalanmasına qarşı çıxaraq təxribatlar törətməyə çalışırdılar. Lakin ABŞ Prezidenti Donald Tramp bu məsələdə təşəbbüs göstərərək müharibənin qarşısını almaq üçün səy göstərəcəyini bəyan etdi. Bu səylərin nəticəsi avqustun 8-də Ağ Evdə keçirilən görüşdə aydın şəkildə özünü göstərdi. Prezident İlham Əliyevin Ağ Evdəki məğrur duruşu və nitqi bir daha sübut etdi ki, o, dünya miqyaslı liderdir. Yaradılmış İşçi Qrupu, inanıram ki, hər üç tərəfin maraqlarını nəzərə alan sülh müqaviləsinin bağlanması istiqamətində səmərəli fəaliyyət göstərəcək. ABŞ hazırda dünya siyasətində mühüm mövqe tutur və həm Rusiya- Ukrayna müharibəsini, həm də dünyadakı digər münaqişələri dayandırmağı hədəfləyir.”
Ayhan
14:04 10.08.2025
Oxunuş sayı: 8134
