Erməni sərhədçilər “Tramp marşrutu” ilə keçən azərbaycanlıların məlumatlarına çıxış əldə edəcəklərmi?
Ermənistan Baş naziri Nikol Paşinyan dəqiq cavab vermir ki, Azərbaycanın əsas hissəsindən Naxçıvana sərnişindaşıma texniki olaraq necə həyata keçiriləcək və erməni sərhədçilərin azərbaycanlıların məlumatlarına çıxışı olacaq, yoxsa yox?
Crossmedia.az xəbər verir ki, bu barədə Ermənistan KİV-ləri məlumat yayıb.
Paşinyanın bu məsələyə reaksiyası belə olub: “Mən bu suala Bəyanatın 3-cü bəndini sitat gətirərək cavab verəcəyəm: “Biz regionda və onun qonşuluğunda dövlətlərin suverenliyi, ərazi bütövlüyü və yurisdiksiyasına hörmət əsasında sülhün, sabitliyin və rifahın təşviqi üçün iki ölkə arasında ölkədaxili, ikitərəfli və beynəlxalq nəqliyyatın təmini məqsədilə kommunikasiyaların açılmasının əhəmiyyətini bir daha təsdiq etdik. Bu səylər Azərbaycan Respublikasının əsas hissəsi və onun Naxçıvan Muxtar Respublikası arasında maneəsiz bağlantını və Ermənistan Respublikası üçün beynəlxalq və ölkədaxili bağlantılar üzrə qarşılıqlı faydaları ehtiva edir”.
Yəni, biz bu mərhələdə detallara varmamışıq, qlobal məsələləri razılaşdırıb imzalamışıq. Hər necə həll olunsa da, qərarlar suverenlik, yurisdiksiya, ərazi bütövlüyü, sərhədlərin toxunulmazlığı prinsipləri çərçivəsində olmalı və qarşılıqlılıq əsasında işləməlidir. Burada sadəcə olaraq fərqli yozumlara yer yoxdur”, - deyə Paşinyan bildirib.
14:18 09.08.2025
Oxunuş sayı: 4381
