"ABŞ həm sülhə nail olur, həm də Cənubi Qafqazda mövqeyini gücləndirir" -RƏY
ABŞ-nin sülh təşəbbüsləri dünyadakı münaqişə ocaqlarını bir-bir aradan qaldırır. Avqustun səkkizində Azərbaycan və Ermənistan arasında əldə edilən razılaşma yaxın gələcəkdə bu münaqişə ocağının tamamilə sönəcəyindən xəbər verir. Əldə edilən razılaşmalar təkcə Azərbaycan və Ermənistanı deyil, həm də regiondakı və dünyadakı bir çox dövlətin maraqlarına xidmət edəcək. Regionda yeni marşrut yolunun açılması, Naxçıvana yeni yolun çəkilməsi, yeni infrastruktur layihələri və iqtisadi inkişaf imkanları yaradacaq. Həmçinin “Tramp yolu” adlandırılan Zəngəzur dəhlizi Asiyadan Avropaya gedən mühüm ticarət yollarından birinə çevriləcək. Digər mühüm məqam isə ABŞ-nin Cənubi Qafqazda, İranın yaxınlığında möhkəmlənməsidir.
Mövzu ilə bağlı Milli Məclisin sabiq deputatı Tahir Kərimli Crossmedia.az-a açıqlama verib:
“Azərbaycan, Ermənistan və ABŞ arasında tarixi sülh sazişi olmasa da, birgə kommunike imzalanıb. Bu, çərçivə sazişidir və hər üç tərəf qəbul edib ki, bu sülh müqaviləsi qədər əhəmiyyətlidir. Çünki dünyanın ən böyük dövlətinin paytaxtında, ABŞ Prezidenti ilə birlikdə bu saziş imzalanıb və hər kəs onun dəyərini anlamalıdır. Azərbaycan-Ermənistan arasında sülh sazişi ilə bağlı çoxsaylı müzakirələr aparılıb. Hazırda sual yaranır: ABŞ-nin vasitəçiliyinin əhəmiyyəti nədən ibarətdir? Birincisi, ABŞ və onun prezidenti bəyan edib ki, son altı ay ərzində artıq beş sülh razılaşmasına nail olunub. Bu, ABŞ-nin dünyada sülhü təşviq etməsi baxımından böyük imic qazandırır. Təsadüfi deyil ki, Azərbaycan Prezidenti İlham Əliyev və Ermənistanın Baş Naziri Nikol Paşinyan ABŞ Prezidentinin Nobel Sülh Mükafatına namizədliyini dəstəkləmək üçün müraciət hazırlamağı öhdələrinə götürüblər. ABŞ sülhü təşviq etməklə on minlərlə insanın həlak olmasının, şəhərlərin və infrastrukturun dağıdılmasının qarşısını alır. Ən pis sülh ən yaxşı müharibədən də üstündür. İkincisi, ABŞ son 200 ildə Cənubi Qafqazda heç vaxt möhkəmlənə bilməyib. Düzdür, Vudro Vilsonun dövründə Böyük Britaniya vasitəsilə müəyyən cəhdlər olub, lakin bunlar epizodik xarakter daşıyıb. İndi isə ilk dəfə olaraq ABŞ Zəngəzur dəhlizini 99 illiyinə icarəyə götürür. Bu, ABŞ-nin İranın yaxınlığında və Rusiyanın yanında möhkəmlənməsi deməkdir. Yəqin ki, "Tramp yolu" adlanan bu marşrutda heç kəs təxribat törətməyə cəhd etməyəcək. Beləliklə, ABŞ həm sülhə nail olur, həm də Cənubi Qafqazda mövqeyini gücləndirir. Bunun geostrateji əhəmiyyəti ondadır ki, İran da öz siyasətini yenidən nəzərdən keçirməyə məcbur olacaq.”
Ayhan
13:34 09.08.2025
Oxunuş sayı: 25162
