"Azərbaycan ABŞ-nin Avropadakı tərəfdaşlarının enerji təhlükəsizliyinin möhkəmlənməsinə xüsusi töhfə verir" - Rəy
Prezident İlham Əliyev avqustun 7-8-də ABŞ-də rəsmi səfərdə olub. Azərbaycan Xarici İşlər Nazirliyi prezidentin səfərinin nəticələrinə dair məlumat yayıb. Məlumatda səfər çərçivəsində keçirilən görüşlər, əldə edilən razılaşmalar, ABŞ-Azərbaycan münasibətlərinin inkişafı üçün atılan addımlar və Azərbaycan-Ermənistan arasında sülh prosesinin sürətləndirilməsi ilə bağlı qərarlar əks olunub. Artıq Azərbaycan tərəfinin tələbləri yerinə yetirilir: ATƏT ləğv ediləcək, Ermənistanın konstitusiyasına düzəlişlər ediləcək. Daim sülh və sabitlikdən yana siyasət aparan Azərbaycan balanslı və qərəzsiz siyasətinin nəticəsində məqsədlərinə nail olub.
Mövzu ilə bağlı Milli Məclisin deputatı Vüqar Bayramov Crossmedia.az-a açıqlama verib:
“Azərbaycan Prezidenti cənab İlham Əliyevin Vaşinqtona səfəri ABŞ Prezidenti Donald Trampın dəvəti ilə baş tutub və region üçün tarixi əhəmiyyət kəsb edib. Səfər zamanı Azərbaycan və Ermənistan arasında sülh gündəliyi ilə yanaşı, ölkəmizlə ABŞ arasında strateji tərəfdaşlığın gücləndirilməsi məsələləri xüsusi müzakirə mövzusu olub. Donald Trampın yenidən hakimiyyətə gəlməsi ABŞ və Azərbaycan münasibətlərində yeni səhifə açdı. Hələ 2024-cü ilin 5 noyabrında ABŞ-da keçirilən prezident seçkilərindən üç ay əvvəl Şuşada keçirilən Qlobal Media Forumunda ABŞ-dakı seçkilərlə bağlı jurnalistin sualına cavab verərkən Prezident İlham Əliyev böyük uzaqgörənlik və cəsarətlə o vaxt prezidentliyə namizəd olan Donald Tramp haqqında müsbət fikirlər söyləyərək onun namizədliyini dəstəkləmişdi. Donald Tramp ABŞ Prezidenti seçildikdən sonra iki ölkə arasında münasibətlərin inkişafında yeni dövr başladı. Hər iki lider arasında telefon danışığı və çoxsaylı məktub mübadiləsi məhz bunu təsdiqləyirdi.”
V. Bayramov həmçinin bildirib:
“Siyasi və strateji əməkdaşlıqla yanaşı, Azərbaycan-ABŞ münasibətləri enerji, ticarət, tranzit, regional bağlantılar, süni intellekt və rəqəmsal infrastruktur da daxil olmaqla iqtisadi sərmayə istiqamətində də inkişaf etdiriləcək. Cənab Prezidentin səfəri zamanı yaradılması razılaşdırılan Strateji İşçi Qrupu regional bağlantılar infrastrukturunun və enerji sahəsində sərmayələrin genişləndirilməsi, həmçinin regional iqtisadi-ticari əməkdaşlığın inkişafı və süni intellektin tətbiqi kimi vacib məsələlərlə məşğul olacaq. Enerji sahəsində əməkdaşlıq ABŞ-ın müttəfiqlərinin Azərbaycan qazı hesabına enerji təhlükəsizliyini daha da gücləndirməsinə imkan yaradacaq. 14 ölkəyə təbii qaz nəql edən Azərbaycan ABŞ-ın Avropadakı tərəfdaşlarının enerji təhlükəsizliyinin möhkəmlənməsinə xüsusi töhfə verir.”
Millət vəkili Azərbaycan və ABŞ arasındakı əməkdaşlıqdan danışarkən qeyd edib:
“ABŞ ilə strateji əməkdaşlıq qeyri-neft sektoruna daha çox texnologiya və innovasiyaların cəlb edilməsinə imkan yaradacaq. Bu, Azərbaycanda iqtisadi diversifikasiya ilə bağlı hədəflərin reallaşmasına dəstək olacaq. Bu kontekstdə ABŞ-Azərbaycan strateji tərəfdaşlığı ABŞ texnologiyalarının və sərmayələrinin ölkəmizə cəlb edilməsi və iqtisadi fəallığın artması deməkdir. Zəfərdən sonra Prezident İlham Əliyev dəfələrlə bəyan edib ki, Azərbaycanın əsas hissəsi ilə Naxçıvan arasında quru yolla maneəsiz əlaqə təmin edilməlidir. Cənab Prezident Zəngəzur dəhlizinin reallaşacağını və bunun sadəcə zaman məsələsi olduğunu vurğulayıb. Azərbaycan Prezidentinin uzaqgörən siyasəti sayəsində imzalanmış Birgə Bəyannamədə ölkəmizin əsas hissəsi ilə Naxçıvan arasında maneəsiz gediş-gəliş təsdiqlənib. Bu, Zəngəzur dəhlizinin reallaşması deməkdir. Vaşinqtonda, həmçinin Zəngəzur dəhlizinin fəaliyyətə başlaması ilə bağlı ABŞ və Ermənistan arasında saziş imzalanıb. Bu, ABŞ Prezidenti Donald Trampın Zəngəzur dəhlizinin qarantı rolunu oynayacağını göstərir. Bununla da Azərbaycan Prezidentinin uzaqgörən siyasəti və qətiyyəti nəticəsində Qafqazda yeni tarix yazıldı. Bu tarix region üçün inkişaf və əməkdaşlıq səhifəsi açır.”
Ayhan
13:05 09.08.2025
Oxunuş sayı: 10362
