Avropadan Yaxın Şərqlə bağlı ikiüzlü ritorika: “İsrailin ilhaq planlarına dəstək verə bilər”
İsrail Ordusunun Baş Qərargah rəisi Eyal Zamir Qəzza zolağında hərbi əməliyyatların davam etdirilməsi ilə bağlı müxtəlif hücum variantlarını Baş nazir Benyamin Netanyahuya təqdim edib. Bu, Zamirin Qəzzanın tam işğalı planına qarşı çıxması ilə bağlı əvvəlki iddialar fonunda xüsusi diqqət çəkir.
Səslənən iddialardan belə çıxır ki, İsrail Qəzzanı tam tutmaqda israrlıdır. Bu isə müharibənin uzanması deməkdir. Bəs rəsmi Təl- Əviv buna hazırdırmı?
Mövzu ilə bağlı Crossmedia.az saytına açıqlama verən politoloq Turan Rzayev bildirib ki, prinsipcə, Qəzzada müharibə HƏMAS-ın İsrailə hücumu ilə başlayıb və bu günədək 60 mindən çox insan həlak olub, bir o qədər də yaralanıb. Hazırda bölgədə ciddi humanitar böhran hökm sürür: “Faktiki olaraq Qəzzada etnik təmizləmə siyasəti aparılır. Bunun artıq adı genişmiqyaslı hərbi əməliyyatlardır. İsrail artıq məqsədini gizlətmir və İordan çayının qərb sahillərini ilhaq etmək niyyətini açıq şəkildə bəyan edir. Onun sözlərinə görə, Qəzzada aparılan əməliyyatlar da məhz bu planlara xidmət edir. Hazırda Avropa ölkələri bu məsələdə daha sərt mövqe sərgiləyirlər. Böyük Britaniya, Almaniya və Fransa açıq şəkildə İsraili xəbərdar edir ki, əgər bu istiqamətdə əməliyyatlar davam edərsə, onlar Fələstinin müstəqilliyini tanıya bilərlər. Bu bəyanatların əsas səbəbi isə həmin ölkələrin daxili ictimaiyyətinin təzyiqləridir. Çünki Qəzzada baş verənlər sosial şəbəkələrdə və mediada gündəmdədir və cəmiyyət öz hökumətindən konkret mövqe tələb edir.”
T. Rzayevin qənaətinə görə, Avropa ölkələrinin bir çoxu yaxın zamanda Fələstinin müstəqilliyini tanıya bilər: “Lakin burada sual doğuran məqam odur ki, bu tanınma Qəzza zolağını da əhatə edəcəkmi? “Mənim şəxsi fikrim budur ki, Fələstinin müstəqilliyi tanınacaq və daha sonra danışıqların yeni mərhələsi başlayacaq. Bu mərhələdə İsrailin Qəzzanı ilhaq etməsi şərti ilə Fələstinin müstəqilliyini tanıması kimi bir razılıq gündəmə gələ bilər. Ancaq bu, olduqca prinsipial məsələdir və nəticəni zaman göstərəcək. Ramallah mərkəzli Fələstin hakimiyyəti ilə Qəzza arasındakı əlaqə uzun illərdir kəsilib. Qəzza HƏMAS-ın, İordan çayının şərq sahili isə Mahmud Abbasın nəzarətindədir. Bu səbəbdən bölgədə faktiki ayrılıq mövcuddur və İsrail də məhz bu vəziyyətdən istifadə edərək Qəzzanı ilhaq etmək istəyir. Avropa isə indi İsrailə təzyiq etsə də, gələcəkdə bu ilhaq planlarına dolayısı ilə dəstək verə bilər.”
Mehriban Yariyeva
22:41 06.08.2025
Oxunuş sayı: 16510
