XİN: Azərbaycanda cəza çəkən 37 İran vətəndaşına görüş üçün şərait yaradılıb
Bəzi penitensiar müəssisələrdə İran İslam Respublikası vətəndaşı
olan məhbuslara ailə üzvləri ilə video görüntü əsasında görüşlərin keçirilməsi
imkanı yaradılıb.
Crossmedia.az xəbər verir ki, bu barədə Xarici İşlər
Nazirliyinin (XİN) mətbuat katibi Ayxan Hacızadənin İranın XİN-in mətbuat
katibinin bu ölkənin Azərbaycanda həbsdə olan vətəndaşları ilə bağlı
iddialarına dair şərhində qeyd olunub.
Bildirilib ki, həbsdə saxlanılan əcnəbilər, o cümlədən İran
vətəndaşları mütəmadi olaraq tibb-sanitariya bölməsində müayinələrdən keçirlər.
Bununla yanaşı, İran İslam Respublikasının Azərbaycan Respublikasındakı Səfirliyinin
əməkdaşları tərəfindən öz vətəndaşları üçün gətirilmiş dərman preparatları tibb
xidmətinin əməkdaşları tərəfindən normativ aktların tələblərinə uyğun qaydada qəbul
edilib və məhkumlara çatdırılıb.
Yalnız 2025-ci ildə İran İslam Respublikasının Səfirliyinin əməkdaşları
ilə penitensiar müəssisələrində cəza çəkən 37 nəfər İran İslam Respublikasının
vətəndaşları arasında konsul görüşünün keçirilməsi üçün şərait yaradılıb. Son
olaraq belə görüş iki İran vətəndaşı ilə 31 iyul tarixində baş tutub.
18:05 04.08.2025
Oxunuş sayı: 7558
