Azərbaycanın Yaxın Şərq siyasətində dönüş: Bakı- Dəməşq əlaqələri güclənir
Azərbaycan, Qətər, Suriya və Türkiyə Azərbaycan qazının Türkiyə ərazisindən Suriyaya nəqlinə başlanılması ilə bağlı birgə açıqlama yayıb.
Türkiyənin Enerji və Təbii Sərvətlər Nazirliyinin yaydığı birgə açıqlamada bu hadisə sözügedən 4 ölkə arasında əlaqələrin dərinləşdirilməsində mühüm addım kimi dəyərləndirilib.
Qeyd olunub ki, rekord müddətdə həyata keçirilən bu layihə Suriyanın münaqişədən sonra yenidən qurulması və normallaşması prosesi üçün mühüm əhəmiyyət kəsb edir:
“Türkiyənin Kilis əyaləti ilə Suriyanın Hələb şəhəri arasında uzanan və gündəlik 6 milyon kubmetr qaz ötürmə qabiliyyətinə malik bu yenilənmiş boru kəməri avqustun 22-də rəsmi olaraq fəaliyyətə başlayıb. Qətər Dövləti Qətər İnkişaf Fondu vasitəsilə bu təşəbbüs çərçivəsində elektrik enerjisi istehsalına dəstək verməklə Suriya Ərəb Respublikasının bərpası və sabitləşməsi prosesinə sadiqliyini bir daha təsdiqləyir.
Hələb Elektrik Stansiyasına təbii qaz axınının başlanması ilə Suriyada elektrik təchizatı əhəmiyyətli dərəcədə artacaq. Bu təşəbbüs Suriya iqtisadiyyatının canlanmasına və insanların həyat şəraitinin yaxşılaşmasına bilavasitə töhfə verən mühüm humanitar addımdır.
Bundan başqa, ölkələrimiz regionda sülhün, sabitliyin və rifahın möhkəmləndirilməsinə sadiq olduqlarını bir daha təsdiqləyirlər”.
Layihənin əhəmiyyəti barədə Crossmedia.az-a açıqlama verən siyasi şərhçi Kənan Novruzov qeyd edib ki, Suriyada hakimiyyət dəyişikliyi baş verdikdən sonra qardaş ölkə Türkiyə hazırkı iqtidarın güclənməsinə və Suriyada sabitliyin bərpa olunmasına xüsusi diqqət yetirir: “Bu baxımdan Azərbaycan sözügedən addımla həm özünün, həm də Türkiyənin maraqlarını təmin etmiş oldu. Bu bir daha dünyaya Azərbaycan-Türkiyə qardaşlığının sözdə deyil, əməldə olduğunu və bu iki qardaş dövlətin xarici siyasətdə də öz addımlarını uyğunlaşdırdığını göstərdi. İkinci tərəfdən qeyd etdiyim kimi, Suriyaya qaz nəqli Azərbaycanın xarici siyasət kursuna tam uyğundur. Bu, iqtisadi məsələdən əlavə olaraq bir siyasi məsələdir. Bundan sonra Azərbaycan təkcə Cənubi Qafqazda deyil, həm də Yaxın Şərq regionunda bir aktora çevrildi. Beləliklə, ölkəmizin Yaxın Şərqdə rolu güclənəcək”.
O bildirib ki, bu addımla Azərbaycan-Suriya əlaqələri yeni mərhələyə qədəm qoydu: “Azərbaycan bu addımla Suriyanın etimadını qazandı. Rəsmi Bakı İsraillə Suriya arasında vasitəçilik edir. Azərbaycanın İsraillə münasibətləri daha köklüdür. Nəzərə almalıyıq ki, hazırki Suriya hakimiyyəti yeni qurulub. Bundan əvvəl iqtidarda Bəşər Əsəd idi. Onun dövründə ikitərəfli əlaqələr minimum səviyyədə idi. İndi isə Suriya ilə əlaqələr artıq yenidən qurulur. Bu addımla isə rəsmi Bakı rəsmi Dəməşqin etibarını və etimadını qazandı. Bu, özlüyündə Azərbaycanın Suriya və İsrail arasında vasitəçilik imkanlarına ciddi səviyyədə töhfə verəcək".
Siyasi şərhçi həmçinin ölkəmizin bu addımı ilə Azərbaycan-Suriya əlaqələrinin yeni mərhələsinə qədəm qoyması ilə bərabər Yaxın Şərq siyasətində bir dönüş nöqtəsi yaratdığını qeyd edib: “Bütövlükdə düşünürəm ki, bu addımla təkcə Azərbaycan-Suriya əlaqələrində yeni mərhələnin əsası qoyulmadı, eyni zamanda Azərbaycanın Yaxın Şərq siyasətində bir dönüş nöqtəsi yaratdı".
Elmir Heydərli
14:28 03.08.2025
Oxunuş sayı: 10532
