Köçəryan: “Rusiyanın Azərbaycan üzərində təsir imkanları ciddi şəkildə azalıb”
Ermənistanın sabiq prezidenti Robert Köçəryan son açıqlamasında Rusiyanın Azərbaycan üzərindəki təsir imkanlarının ciddi şəkildə zəiflədiyini bildirib. O, Qarabağ münaqişəsinin nəticələrinin Azərbaycanı daha cəsarətli etdiyini və Rusiyanın bölgədəki mövqeyinin zəiflədiyini qeyd edib : "Azərbaycan müəyyən mənada Rusiyanı Avropanı neft və qazla təmin edən tərəf kimi əvəz edir. Bu faktı isə onlar daha cəsarətli davranışlarla kapitala çevirməyə çalışırlar. Bu, gözlənilən idi ".
Rusiya yox, Ermənistanın maraqları və təhlükəsizliyi haqda düşünmək lazımdır deyə Köçəryan vurğulayıb: “Gəlin başa düşək ki, bu regionda Ermənistan üçün hansı ölkələr təhlükə mənbəyidir? Hansı ölkələr bizim ərazilərimizə iddia edir? Birbaşa təhlükə mənbələri – Türkiyə və Azərbaycandır. Azərbaycan ən yüksək səviyyədə bəyan edir ki, Göyçə onlarınkıdır, İrəvan Azərbaycan şəhəridir, Zəngəzur da onlarınkıdır".
“Sonra düşünməliyik: hansı ölkə bu təhdidləri cilovlaya bilər, belə imkanlara və maraqlara malikdir? Nə qədər fırlatsanız da, belə bir ölkə var, bu da Rusiyadır. Dəqiq deyirəm, Fransa deyil. Fransanın burada həyati maraqları yoxdur, ordusu isə cəmi 200 min nəfərdir, onlardan yerüstü döyüş hazırlığı olanlar 50 min nəfər belə deyil. Azərbaycan və Türkiyəni cilovlaya biləcək yeganə ölkə Rusiyadır, onun da burada maraqları var.
İndi ağıllı bir lider belə bir vəziyyətdə o ölkə ilə münasibətlər qurmağa çalışar ki, onun imkanları və maraqları Ermənistan üçün bu təhdidləri cilovlasın.
Bəs indiki Ermənistan rəhbərliyi nə edib? Rusiya ilə düşmənçilik edir, eyni zamanda Ermənistan üçün birbaşa təhlükə olan ölkələrlə dostluq qurmağa çalışır. Bunu sağlam düşüncə ilə izah etmək mümkündürmü? Beynəlxalq münasibətlər bu cür işləmir",- deyə R. Köçəryan bildirib.
Crossmedia.az xəbər verir ki, o ,həmçinin Azərbaycan və Türkiyənin Ermənistan qarşısındakı iştahını cilovlaya biləcək yeganə imkan Rusiya olduğunu vurğulayıb : " Kim deyirsə ki, bu, ABŞ-dır, qoy olsun, amma ABŞ-nin nə burada imkanı, nə də istəyi var.
Sülh müqaviləsi sadəcə kağız parçası olmayacaq. Əgər bu müqavilənin icrasına zəmanət verən güclü bir ölkə də varsa, bu artıq sülh müqaviləsi olar. Beynəlxalq münasibətlər belə işləyir.
İndi sən öz üstünlüklərini zibilə atırsan, gedib haradasa olmayan müsbət elementlər axtarırsan. Cənubi Qafqaz üzərində Türkiyə və Rusiya arasında azı 250 ildir rəqabət gedir. Bu rəqabət bəzən müharibəyə, bəzən sülhə səbəb olub, amma həmişə olub və dəyişməyib. Mənim fikrim budur: əgər sənin arxanda cilovlayıcı bir qüvvə varsa, bu sülh müqaviləsi çox daha uğurlu və zəmanətli olacaq".
O sonda qeyd edib ki, əgər bu günədək Ermənistan rəhbərliyi bunu anlamayıbsa, bu sadəcə olaraq geosiyasi nadanlığın göstəricisidir. Onlar özləri etiraf edirlər ki, sadəcə olaraq savadsız və diletantdırlar.
Pərvin Hacıyeva
14:03 03.08.2025
Oxunuş sayı: 762
