Türkiyə KİV-i Azərbaycanla Ermənistan arasında sülh sazişinin imzalanacağı tarixi açıqlayıb
Azərbaycan və Ermənistan arasında sülh prosesi yekun mərhələyə yaxınlaşır. Tərəflər yaxın vaxtlarda sazişi paraflaya (ilkin imza ata) bilərlər. Lakin sənədin rəsmi imzası 2026-cı ilin iyununa planlaşdırılır.
Crossmedia.az xəbər verir ki, bu barədə Türkiyə KİV- i məlumat yayıb.
Qeyd olunub ki, sazişin imzalanmasının təxirə salınmasının əsas səbəbi Ermənistanın konstitusiyasında dəyişiklik zərurətidir: “Azərbaycan tələb edir ki, Ermənistan 1990-cı il Müstəqillik Bəyannaməsində yer alan və Bakının ərazi iddiası kimi şərh etdiyi müddəaları referendum yolu ilə ləğv etsin. Sazişin şərtlərinə bunlar daxildir: Ermənistanın konstitusiyasında dəyişiklik edilməsi, ATƏT-in Minsk Qrupunun fəaliyyətinə son verilməsi, Qarabağla bağlı beynəlxalq məhkəmə iddialarının geri çəkilməsi”.
Həmçinin bildirilib ki, sazişin imzalanması Ermənistanda parlament seçkilərinin keçirilməsi ilə eyni vaxta təsadüf edə, yəni gələn ilin iyununda baş verə bilər: “Bu zaman konstitusiya dəyişikliyi üçün referendumun da keçirilməsi gözlənilir. Ekspertlərin fikrincə, prosesin uzanmasının qarşısını almaq üçün sərhəddə gərginliyin azaldılması və siyasi iradənin qorunması vacibdir”.
Nigar Rəhimova
22:53 01.08.2025
Oxunuş sayı: 1657
