Gündəm

İran Prezidentindən Azərbaycanla bağlı ikibaşlı açıqlama: O, əslində nə demək istəyib?

İran Prezidenti Məsud Pezeşkian Zəncana səfəri zamanı çıxışında Azərbaycanın İranla əlaqə qura bilməməsinə görə məsuliyyətin məhz Tehran rəhbərliyinin üzərinə düşdüyünü bildirib. O, İranın qonşu və müsəlman ölkələrlə münasibət qura bilmədiyini, lakin İsrailin Azərbaycanda diplomatik və iqtisadi əlaqələr yaratmağa nail olduğunu xüsusi vurğulayıb. Bu açıqlama rəsmi Tehranın regional siyasətində dəyişikliklərə gedəcəyi ilə bağlı mesaj kimi qiymətləndirilir.

Prezidentinin açıqlaması əslində ikibaşlıdır. Bəziləri düşünür ki, Pezeşkian bu açıqlaması ilə Azərbaycanla münasibətləri daha da inkişaf etdirəcəyinə eyham vurub. Bir çox analitik isə düşünür ki, bu, əslində Tehranın Bakı- Təl- Əviv münasibətlərinə qısqanclığının təzahürüdür.

Pezeşkianın açıqlamasını Crossmedia.az-a şərh edən Milli Məclisin deputatı Azər Badamov bildirib ki, Pezeşkian müsəlman ölkələri ilə, o cümlədən Azərbaycanla münasibətlərin zəif olmasına görə İranın əvvəlki yanlış siyasətini açıq şəkildə etiraf edir: “Prezident Pezeşkian bildirib ki, səfər etdiyim Azərbaycanla münasibət qura bilmirik, ancaq o tərəfdən İsrail gəlib, orada əlaqə qurur. Bu, onun məsələyə daha obyektiv yanaşdığını göstərir və İranın yeni dövrdə qonşuluq siyasətinə yenidən baxacağına ümid verir".

Deputatın fikrincə, Pezeşkianın çıxışında Azərbaycanın bölgədəki mühüm rolu və inkişaf etmiş mövqeyi də nəzərə çarpır: “Onun Azərbaycanla bağlı isti münasibəti və bu istiqamətdə mesajları İranda müəyyən dairələrdə narahatlıq yaradıb. İran Prezidenti münasibətlərə obyektiv yanaşır və Azərbaycanla əlaqələrin möhkəmləndirilməsinin vacibliyini qeyd edir. Təbii ki, Pezeşkianın Azərbaycana isti münasibəti İranda yaşayan ermənilərin ürəyincə deyil və bu səbəbdən onun ünvanına istehzalı fikirlərin səsləndirildiyinin şahidi oluruq. Pezeşkian Azərbaycanın regional güc olduğunu anlayır və rəsmi Tehran bu reallıqla hesablaşaraq münasibətləri inkişaf etdirməyə çalışmalıdır. Azərbaycanın müstəqil xarici siyasəti heç bir ölkəyə qarşı yönəlməyib və bu, İsrail də daxil olmaqla, bütün tərəfdaş ölkələr tərəfindən qəbul edilir”.

“Pezeşkian yaxşı anlayır ki, regionun inkişaf etmiş və güclü ölkəsi olan Azərbaycanla əlaqələri genişləndirməklə İran üçün daha yaxşı nəticələrə nail olmaq mümkündür. Pezeşkianın Azərbaycanla bağlı fikirləri İsraildə qısqanclıq yaratmaz. Çünki İsrail yaxşı bilir ki, Azərbaycanın xarici siyasəti müstəqildir, qarşılıqlı fayda və milli maraqlar üzərində qurulmuşdur”, - siyasətçi bildirib.

Müsahibiniz əlavə edib ki, Azərbaycanın qonşuları ilə münasibətlərinin inkişaf etdirilməsi İsraillə əməkdaşlığa mənfi təsir göstərmir və bu siyasət bölgədə sabitliyin qorunmasına xidmət edir: “Azərbaycan-İsrail münasibətlərinə görə İranda qısqanclıq yaranmamalıdır. Çünki Azərbaycanın beynəlxalq siyasəti heç bir ölkəyə qarşı yönəlməmişdir. Əksinə, ölkəmiz münasibətləri gərgin olan tərəflər arasında belə əlaqələrin normallaşmasına töhfə verir. Azərbaycanın bu mövqeyi bütün qonşu ölkələr tərəfindən anlayışla qarşılanmalı və regionda əməkdaşlığa yol açmalıdır”.

Mehriban Yariyeva

🖨 Çap et

14:52 01.08.2025

Oxunuş sayı: 20357