Deputat: “Suriya və İsrailin mövqelərinin yaxınlaşması üçün Azərbaycan çox böyük addımlar atır”
Müəyyən məlumatlara görə, Bakıda Suriya və İsrail arasında nazirlər səviyyəsində görüş baş tutacaq.
Görüşdə Suriyanın xarici işlər naziri Əsəd əş-Şibani və İsrailin strateji planlaşdırma naziri Ron Dermer iştirak edəcək.
Qeyd olunur ki, danışıqlarda təhlükəsizliklə bağlı vəziyyət, o cümlədən Suriyanın cənubundakı vəziyyət müzakirə olunub.
Uzun illərdir qarşıdurma və gərginliklə yadda qalan bu iki ölkənin təmsilçilərinin eyni masa ətrafında toplaşması, həm regional, həm də qlobal miqyasda diqqətlə izlənilir. Azərbaycanın vasitəçiliyi ilə baş tutan bu görüş ölkəmizin diplomatik nüfuzunun artdığını və regionda sülhə aparan dialoqun mühüm ünvanına çevrildiyini göstərir. Bəs bu tarixi addım konkret hansı nəticələr vəd edir? Azərbaycanın balanslı siyasəti və vasitəçilik rolu Yaxın Şərqə sülh gətirə bilərmi?
Mövzu ilə bağlıMilli Məclisin deputatı Azər Allahverənov Crossmedia.az-a açıqlama verib: “Azərbaycan regionda yalnız sülhü təşviq etmir və ya hansısa diplomatik müstəvidə danışıqların aparılması üçün platforma funksiyasını yerinə yetirmir. Rəsmi Bakı artıq uzun müddətdir ki, bir çox gərgin ölkələr arasındakı münasibətlərin normallaşdırılması istiqamətində çox vacib missiyanı həyata keçirir. Bunun üçün Azərbaycan bir çox məsələlərdə tək danışıqların aparılması üçün məkan verən yox həm də bu danışıqların aparılmasına dair təşəbbüslə çıxış edən dövlətdir. Bir çox proseslərdə də vasitəçilik edən tərəf qismində özünü təsdiq edib. Beynəlxalq münasibətlər sistemində Azərbaycanın yüksək olan nüfuzu, reputasiyası məhz bu qisimdə ölkənin nümayiş olunması üçün də çox vacib bir rol oynayır. Məsələ bundadır ki, istənilən münaqişə edən tərəflərin bir masaya oturdulması üçün vasitəçilik edən dövlət hər iki tərəf üçün uyğun bir tərəfdaş olsun. Və Azərbaycanın xarici siyasət kursunun bu kimi güclü tərəfləri xüsusilə də bir sıra dövlətlərlə çoxtərəfli münasibətlərinin inkişaf etdirilməsi, bəzi məsələlərdə hətta tərəfdaşlıq səviyyəsinə qaldırılması üçün dövlətimizin göstərdiyi səylər öz nəticəsini verir. Bu uğurun hesabına da Azərbaycan vasitəçi qismində çıxış etməklə münaqişə edən və ya münasibətləri gərgin olan dövlətləri bir araya gətirməkdə də çox uğurlu bir fəaliyyətə imza atmış olur”.
Deputat həmçinin bildirib ki, COP29 mövzusunda dövlətlərin səylərinin birləşdirilməsi, bu sahəyə pul ayrılması və digər məsələlərdə Azərbaycanın təşəbbüskar və vasitəçi qismində çıxış etməsi əldə olan uğurlar fonunda nə qədər faydalı olduğunu göstərmiş oldu: “Xatırladıram ki, 2024-cü ildə ABŞ və Rusiya hərbi komandanlıqlarının görüşləri də Bakıda keçirilmişdi ki, Rusiya-Ukrayna müharibəsi ilə bağlı ciddi müzakirələr aparılmışdı. Digər tərəfdən nəzərə alsaq ki, İsrail-Suriya, İsrail-Türkiyə münasibətlərində də müəyyən gərginliklər var, bu münasibətlərin normallaşması istiqamətində Azərbaycan öz vasitəçilik təklifini irəli sürür. Azərbaycan strateji müttəfiqləri olan İsrail və Türkiyə münasibətlərinin tənzimlənməsində də kifayət qədər aktiv rol oynayır. İndi də israil-Suriya münsibətlərinin gərginləşdiyi şəraitdə də Azərbaycan öz sözünü deməkdədir. Mövqelərin yaxınlaşması, masaya oturması üçün Azərbaycan çox böyük addımlar atır”.
Ayhan
22:11 31.07.2025
Oxunuş sayı: 8898
