Millət vəkilindən Əli Kərimlinin iddialarına cavab: "Ya qərəzli məqsəd daşıyır, ya da..."
Azərbaycanın daim vuruşduğu iki cəbhə olub. Biri dövlətimizin mübarizə apardığı, milli maraqlarımıza qarşı çıxan, bizə qarşı daim ərazi iddiaları ilə çıxış edən xarici düşmənlər. Digəri də suyumuzu içən, torpağımızda gəzən, dövlətimizin “vətəndaş”ı olan güruhlar. Əli Kərimli kimilər. Ölkədə baş verən istənilən situasiyada bizi bizi biabır etməyə çalışarkən özü biabır olan Əli Kərimli Facebook hesabında yeni paylaşımı ilə öz “vətəndaş”lığını bir daha sübut etdi.
Paylaşımda qeyd edir ki, Rusiya hökumətinin o ölkədə yaşayan azərbaycanlılara qarşı repressiyanı davam etdirdiyi bir şəraitdə Rusiya neftini Azərbaycan gəmilərilə qaçaqmalçılıq yolu ilə satmaq, Rusiyanın beynəlxalq sanksiyalardan yayınmasına kömək etmək tər-təmiz anti-Azərbaycan hərəkəti deyilmi?
Bütün post-Sovet məkanını, o cümlədən də Azərbaycanı öz nəzarətinə götürməklə, faktiki işğal etməklə təhdid edən Rusiyanın beynəlxalq sanksiyalardan yayınmasına kömək etmək anti-millilikdirsə, belə bir çirkin işə azərbaycanlılara çox əziz olan Qarabağ, Şuşa, Zəngəzur və Nizami Gəncəvi adlarını bulaşdırmaq ikiqat anti-millilikdir.
Beynəlxalq sanksiyalardan yan keçməklə Rusiya neftini satan Azərbaycan gəmilərinə qarşı Avropa İttifaqı və Böyük Britaniyanın sanksiya qoyması ilə məsələ bitmir. Bu qaçaqmalçılar Rusiyanın imperiya siyasətinə xidmət etdikləri üçün Azərbaycan xalqı qarşısında da məsuliyyət daşımalıdırlar.
Əli Kərimlinin iddiaları ilə bağlı Milli Məclisin deputatı Hikmət Babaoğlu Crossmedia.az-a açıqlama verib:
“Beynəlxalq dəniz yükdaşımalarının ayrıca müəyyən edilmiş qaydaları var. Bəzən bir ölkəyə məxsus gəmi başqa bir ölkənin bayrağı altında sırf ticarət məqsədi ilə yükləri daşımağa cəlb olunur. Bu da bir ticarət növü hesab olunur. Ona görə də biz bəzən görürük ki, gəmi kapitanları müxtəlif ölkələrin vətəndaşlarından ibarət bir komanda heyəti düzəlir və bu komanda ticarətlə məşğul olur. Ona görə də bu ticari hadisəni siyasi qərar kimi təqdim etmək düzgün deyil. Çünki nəticə etibarilə bu sırf ticarət məqsədi ilə həyata keçirilən fəaliyyət növüdür. Çox təəssüf ki, Azərbaycana məxsus gəmilərlə daşınan yüklərlə bağlı da belə bir iddia ortaya atılıb. Əlbəttə ki, buna siyasi don geyindirmək ya qərəzli məqsəd daşıyır, ya da naviqasiya qaydalarını bilməməkdən irəli gəlir. Ona görə də Əli Kərimlinin ittihamları təmamilə əsassızdır. Azərbaycan dövlətini gözdən salmağa və bizi sevməyən qüvvələrin əlinə saxta arqumentlər verməyə yönəlib. Bu, əlbəttə, təmamilə milli maraqlara zidd olan bir vəziyyətdir”.
Ayhan
13:22 31.07.2025
Oxunuş sayı: 13420
