Səfirdən mesaj: ABŞ- Azərbaycan əlaqələri Çini narahat edir? - Sabiq nazir açıqladı
Çin Xalq Azadlıq Ordusunun yaradılmasının
98-ci ildönümü və Çinin Yaponiya işğalından azad edilməsinin 80 illiyinə həsr
olunmuş tədbirdə Çinin Azərbaycandakı səfiri Lu Mey deyib ki, Çin Prezident
İlham Əliyev və Çin Xalq Respublikasının Sədri Si Cinpin arasında əldə olunmuş
mühüm razılaşmaların həyata keçirilməsi üçün Azərbaycanla sıx əməkdaşlığa
hazırdır.
Diplomat həmçinin vurğulayıb ki, rəsmi
Pekin hər iki ölkənin xalqlarının rifahı naminə qarşılıqlı faydalı tərəfdaşlığı
inkişaf etdirmək üçün Bakı ilə əməkdaşlığa hazırdır.
“Diplomatik münasibətlərin qurulmasından
bəri keçən 33 il ərzində Çin-Azərbaycan əlaqələri sabit inkişaf dinamikası
nümayiş etdirib. Müxtəlif sahələrdə səmərəli əməkdaşlıq əlaqələrimizin
möhkəmlənməsinə güclü təkan verib və hər iki ölkənin xalqlarına nəzərəçarpacaq
faydalar verib.
Bu ilin aprelində Prezident İlham Əliyevin
Çinə üçüncü dövlət səfəri zamanı Çin Xalq Respublikasının Sədri Si Cin və
Azərbaycan Prezidenti Çin və Azərbaycan arasında hərtərəfli strateji
tərəfdaşlıq yaradılması haqqında birgə bəyanatı imzalayıb. Bu sənəd ikitərəfli
münasibətlərin inkişafında yeni tarixi fəsil açdı”, - o vurğulayıb.
Səfirin səsləndirdiyi fikirlər
əsasında Pekin- Bakı əlaqələrinin perspektivi barədə Crossmedia.az-a danışan
keçmiş xarici işlər naziri Tofiq Zülfüqarov deyib ki, Çin rəsmiləri əvvəllər də dəfələrlə oxşar
açıqlamalar veriblər: “Çin Azərbaycana
investisiya qoyuluşunda, ölkəmizin transit ərazi kimi istifadə olunmasında, yni
texnologiyaların gətirilməsində maraqlıdır. Verilən bəyanatlar da bu aspektdən
qiymətləndirilməlidir. Bu, Çinin yeni mövqeyi deyil”.
Diplomatın sözlərinə görə, ABŞ
ilə Azərbaycan arasında əlaqələrin inkişafı Çini narahat etməməlidir: “Bunun Pekini
qısqandıracağını düşünmürəm. Çinin dünyada ABŞ ilə əməkdaşlıq edən kifayət qədər
tərəfdaşı var”.
Kənan Novruzov
17:03 30.07.2025
Oxunuş sayı: 7844
