Vaşinqtonda “Ana dili və multikultural mühit" adlı tədbir keçirilib
Azərbaycanın ABŞ-dakı Səfirliyi və Vaşinqtonda Azərbaycan Mədəniyyət Mərkəzinin təşkilatçılığı ilə AMEA-nın Nəsimi adına Dilçilik İnstitutunun aparıcı elmi işçisi, filologiya üzrə fəlsəfə doktoru Zülfiyyə Musavinin təqdimatında "Ana dili və multikultural mühit" adlı tədbir keçirilib.
Crossmedia.az xəbər verir ki, ABŞ - Azərbaycan Ticarət Palatasının (USACC) icraçı direktoru Natiq Baxışov giriş nitqi zamanı müxtəlif mədəniyyətlərin birgə yaşadığı mühitdə ana dilinin qorunmasının vacibliyini qeyd edib. Azərbaycanın ABŞ-dəki Səfirliyinin müaşviri Erkin Heydərli Azərbaycanın çətin tarixi yol keçdiyini, buna baxmayaraq dilini hər zaman qoruduğunu bildirib. Onun sözlərinə görə, Azərbaycan dili bir çətir altında birləşdirici dildir. Diplomat dilimizin xüsusilə xaricdə yaşayan azərbaycanlılar arasında daim qorunmalı olduğunu diqqətə çatdırıb.
Daha sonra dilçi alim Zülfiyyə Musavi çıxış edərək 25 ildir psixolinqvistika ilə məşğul olduğunu və onun həyatının bütün mərhələlərində insanı izlədiyini bildirib. Alimin sözlərinə görə, dil təkcə ünsiyyət deyil, həm də milli şüurumuz, mədəniyyətimizi qoruma vasitəsidir. Multikultural mühitdə ana dili ilə yanaşı, sosial mühitin dili də danışılır və adət-ənənəmizi qorumaq üçün bu mühitdə ana dilində danışmağı davam etdirmək lazımdır.
Zülfiyyə Musəvi dilin qorunmasında toponimlərin də rolu barədə məlumat verib. Daha sonra tədbirdə dil və toponim, iki və çoxdillilik, onun uşaqların inkişafına təsiri ətrafında interaktiv müzakirə aparılıb.
09:33 30.07.2025
Oxunuş sayı: 7220
