Zəngəzur dəhlizinin açılması Ermənistandan asılıdır: "Ya praktik addımlar atacaq, ya da..."
"Zəngəzur dəhlizinin açılması ilə bağlı hazırda dəqiq vaxt söyləmək mümkün deyil. Çünki Ermənistan bu məsələ ilə bağlı konkret mövqe sərgiləmir".
Bu sözləri Crossmedia.az-a açıqlamasında Milli Məclisin deputatı Nigar Məmmədova deyib:
" Ümumiyyətlə, Ermənistan tərəfi bu illər ərzində dəhlizlə bağlı heç bir iş görməyib. Hətta bu məsələ məqsədli şəkildə gündəmdən çıxarılıb. Bu günlərdə İrəvanın ABŞ-nin məlum təklifindən imtina etdiyini də gördük.
Azərbaycanın dəhlizlə bağlı mövqeyi isə dəyişməyib. Son 5 ildə rəsmi Bakı bu istiqamətdə lazımi addımlar atır. Belə ki, Ermənistan və İranla sərhədin qovuşuğuna qədər dəmir yolunun tikintisi artıq başa çatmaq üzrədir. Hətta 3-cü Şuşa Qlobal Forumunda Prezident İlham Əliyev də bəyan etdi ki, bizim ərazidə heç bir operator, heç bir ticarətçi, heç bir icarədar ola bilməz. Zəngəzur dəhlizi arteriya kimi bir çox ölkələri birləşdirəcək. Yəni söhbət beynəlxalq tranzit dəhlizdən gedir".
Deputat, həmçinin Azərbaycanın Gürcüstan, İran və Rusiya ilə nəqliyyat əlaqələrini gücləndirdiyini vurğulayıb: "Rəsmi şəkildə bəyan olunub ki, Ermənistan da istəsə, Transqafqaz dəhlizi üzərində birgə işləməyə hazırıq. Zəngəzur dəhlizinin reallaşması Şimal-Cənub dəhlizinin başqa istiqamətinin açılması deməkdir. Belə ki, Rusiyadan Azərbaycan vasitəsilə İrana, Rəştə, həm də Şərqi Zəngəzur və Zəngəzur bölgəsinin digər hissələrindən İrana, oradan da Türkiyəyə yolun açılması nəzərdə tutulur. Bundan başqa, Əbu-Dabi görüşündə də müzakirə olunan məsələlərdən biri Zəngəzur dəhlizinin açılması olub. Həmin görüşdə də bir daha Paşinyana izah olunub ki, bizim Azərbaycandan Azərbaycana maneəsiz və təhlükəsiz keçidimiz olmalıdır. Bu, Azərbaycanın bir bölgəsindən ölkənin digər bölgəsinə keçiddir. Bizim yüklər və bizim vətəndaşlar, hər dəfə orada sərhədçi erməninin simasını görməli deyil".
N.Məmmədovanın sözlərinə görə, dəhlizin açılması Ermənistandan asılıdır: "Ya Ermənistan reallığı dərk edib, praktik adımlar atacaq, ya da tranzit ölkəyə çevrilmək şansını tamamilə itirəcək. Bu isə cənab Prezidentin də söylədiyi kimi, Ermənistanın həm də siyasi təcridi olacaq".
Fatimə Məmmədova
15:38 29.07.2025
Oxunuş sayı: 9708
