“Bu ölkə Azərbaycandakı döyüş təcrübəsindən yararlanmaq üçün dəfələrlə müraciət edib” - RƏY
Azərbaycan ilə İtaliya arasında hərbi əməkdaşlıq əlaqələri dinamik inkişaf edir və bu istiqamətdə qarşılıqlı səfərlər xüsusi əhəmiyyət daşıyır. Məhz bu kontekstdə İtaliya Silahlı Qüvvələrinin Baş Qərargah rəisi general Luçano Portolanonun rəhbərlik etdiyi nümayəndə heyətinin Azərbaycana səfəri mühüm əhəmiyyət kəsb edir. Səfər çərçivəsində keçirilən görüşlərdə iki ölkə arasında hərbi, hərbi-texniki və hərbi təhsil sahələrində əməkdaşlığın genişləndirilməsi məsələləri müzakirə olunub, həmçinin kibertəhlükəsizlik və hərbi idarəetmə sahələrində əldə edilən nailiyyətlərə dair ətraflı təqdimatlar keçirilib. Bu səfər tərəflər arasında strateji tərəfdaşlığın daha da möhkəmlənməsinə xidmət edən vacib addım kimi qiymətləndirilir.
Mövzu ilə bağlı hərbi ekspert Şair Ramaldanov Crossmedia.az-a açıqlama verib: “Azərbaycan bir çox dövlətlə müxtəlif istiqamətlərdə öz münasibətlərini genişləndirir. İtaliya ilə də bizim hərbi-texniki əməkdaşlığımız var. Azərbaycanda İtaliyanın hərbi atteşesi, İtaliyada da Azərbaycanın hərbi atteşesi fəaliyyət göstərir. Azərbaycan hərbi-texniki sahədə əməkdaşlıq çərçivəsində İtaliyadan iki yük təyyarəsi alıb. Bu istiqamətdə münasibətlərimizin genişlənməsində həm İtaliya həm də Azərbaycan maraqlıdır. Azərbaycan Vətən Müharibəsində qələbə qazanandan sonra, digər dövlətlər kimi İtaliya da məhz Azərbaycana maraq göstərir və Azərbaycandakı döyüş təcrübəsindən yararlanmaq üçün dəfələrlə müraciət edib. Təbii ki, həm bu həm də Azərbaycanın əməkdaşlığa açıq olması İtaliyanın Azərbaycana marağını böyüdür. Prinsip cəhətdən bu münasibətlər Azərbaycanın maraqlarına da tam uyğundur. Bu maraqlar çərçivəsində əməkdaşlıqlar da genişləndirilir və inkişaf etdirilir”.
Ayhan
15:31 24.07.2025
Oxunuş sayı: 7359
