“Azərbaycanın informasiya suverenliyi güclənib”- Deputat
Azərbaycan mediası təkcə daxili auditoriyaya deyil, həm də beynəlxalq ictimaiyyətə yönəlmiş informasiya siyasətinin əsas dayaqlarından birinə çevrilib. Bu barədə Prezidentin köməkçisi, Xarici siyasət məsələləri şöbəsinin müdiri Hikmət Hacıyev şəxsi "X" hesabında paylaşım edərək, Azərbaycan mediasını “yumuşaq güc” kimi səciyyələndirib.
Azərbaycan Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyevin Milli Mətbuat Günü münasibətilə "X" hesabında yazıb ki, bu gün Azərbaycan mediası milli sərhədləri aşaraq beynəlxalq səviyyədə fəaliyyət göstərən, qlobal perspektivli regional baxış təqdim edən, dünyanın müxtəlif bölgələrində oxunan və istinad olunan, Azərbaycanın yeni- qlobal xarakterli xarici siyasəti ilə uzlaşan təsirli “yumşaq güc” vasitələrindən biridir.
O bildirib ki, bu əlamətdar gün yalnız media ictimaiyyəti üçün deyil, bütövlükdə cəmiyyətimiz üçün böyük əhəmiyyət daşıyır:
"Jurnalistika şərəfli və yüksək məsuliyyət tələb edən peşədir. Sizlər bu çətin, lakin vacib missiyanı peşəkarlıqla yerinə yetirir, cəmiyyətin obyektiv məlumatlandırılması, maarifləndirilməsi və milli dəyərlərin təbliği istiqamətində fədakarcasına çalışırsınız. Cənab Prezidentimiz İlham Əliyevin mediamıza verdiyi yüksək qiymət və söylədiyi dəyərli fikirlər jurnalistika peşəsinə göstərilən böyük etimad və diqqətin bariz nümunəsidir. Azərbaycan milli mətbuatının 150 illik yubileyinin qeyd olunması ilə bağlı dövlət başçımızın Sərəncamı, eləcə də bir çox peşəkar jurnalistin dövlət təltiflərinə layiq görülməsi ölkəmizdə medianın inkişafına verilən önəmin təzahürüdür və bu sahədə çalışanlar üçün böyük stimuldur. Bu əlamətdar yubiley münasibətilə hər birinizi bir daha səmimi qəlbdən təbrik edir, Cənab Prezidentimizin mediamız qarşısında müəyyənləşdirdiyi hədəflərin reallaşmasında, dövlətçiliyimizin möhkəmləndirilməsi və milli maraqlarımızın qorunması yolunda fəaliyyətinizdə davamlı uğurlar arzulayıram".
Prezidentin köməkçinin bu fikirləri barədə Crossmedia.az-a danışan Milli Məclisin deputatı, professor Hikmət Babaoğlu deyib ki, Hikmət Hacıyevin bu fikri milli informasiya siyasətimizin yüksək inkişaf mərhələsinə çatdığını nümayiş etdirir. “Müasir dövrdə informasiya təkcə xəbər ötürmək funksiyası daşımır, həm də ictimai rəyin formalaşması və xarici siyasət prioritetlərinin müəyyənləşdirilməsində həlledici rol oynayır. Bu gün informasiya rəqabəti və ictimai təsir imkanları, həm daxili sabitliyin qorunmasında, həm də xarici arenada milli maraqların müdafiəsində əsas rol oynayır. Rəqəmsal platformalar – “X”, “Facebook”, “Instagram”, internet televiziyaları və digər sosial şəbəkələr Azərbaycanın yumuşaq güc arsenalının ayrılmaz hissəsinə çevrilib. Media bu vasitələrlə ölkə daxilində ictimai fikri yönləndirir, eyni zamanda beynəlxalq ictimaiyyətə aydın və məqsədyönlü mesajlar çatdırır”.
Deputat həmçinin əlavə edib ki, ölkədə analitik medianın formalaşması da mühüm mərhələlərdən biridir: “Belə media informasiyanı yalnız yaymır, həm də onu təhlil edir və ictimai rəyə əsaslandırılmış şəkildə təqdim edir ki, bu da xarici siyasət institutları üçün əsas baza materialı rolunu oynayır.
Prezident İlham Əliyevin Şuşada verdiyi açıqlamada qeyd etdiyi kimi, xarici media orqanları artıq Azərbaycan mediasının yayımladığı materiallara istinad edir və ölkəmizin rəsmi mövqelərini həmin məlumatlar əsasında təhlil edir. Bu tendensiya Azərbaycanın informasiya suverenliyinin gücləndiyini və media vasitəsilə yumuşaq güc potensialının artdığını göstərir. Nəticə etibarilə, Azərbaycan mediası bu gün həm dövlət siyasətinin ictimai dayağı, həm də xarici siyasətin təsirli informasiya aləti kimi çıxış edir”.
Elmir Heydərli
19:59 22.07.2025
Oxunuş sayı: 7627
