Təyyarə qəzasi beynəlxalq gündəmdə: Azərbaycan ədalət üçün hərəkətə keçir
Aktau yaxınlığında “Azərbaycan Hava Yolları”na məxsus sərnişin təyyarəsinin qəzaya uğraması ilə bağlı Rusiya tərəfinin hələ də cavab verməməsi fonunda Azərbaycan beynəlxalq məhkəməyə müraciət etməyə hazırlaşır. Prezident İlham Əliyev Şuşa Qlobal Media Forumunda məsələni qaldıraraq Rusiya tərəfindən heç bir rəsmi cavabın verilmədiyini xüsusi vurğulayıb və bildirib ki, artıq beynəlxalq instansiyalara təqdim olunmaq üçün dosye hazırlanır. Bu hadisə Rusiya üçün ciddi hüquqi məsuliyyətlər yarada bilər və Azərbaycanın beynəlxalq hüquq çərçivəsində ədalətə nail olmaq üçün əhəmiyyətli əsasları var.
Azərbaycan liderinin səsləndirdiyi bu fikirlər barədə Crossmedia.az saytına açıqlama verən Milli Məclisin deputatı Ceyhun Məmmədov bildirib ki, Prezident İlham Əliyevin bu məsələyə Forum çərçivəsində yenidən toxunması problemin ciddiliyindən xəbər verir: “Cənab Prezident bu məsələyə Şuşa Forumunda bir daha toxundu və Rusiya tərəfinin Azərbaycanın dəfələrlə etdiyi müraciətlərə baxmayaraq, heç bir reaksiya vermədiyini xüsusi vurğuladı. Bu günə qədər Azərbaycan tərəfinə heç bir rəsmi cavab təqdim edilməyib. Belə olan halda isə Azərbaycan yalnız aidiyyəti strukturlara deyil, eyni zamanda beynəlxalq təşkilatlara da müraciət etməlidir ki, bu məsələ ədalətli şəkildə araşdırılsın. Qarşımızda analoji bir hadisə – Ukrayna ərazisində baş vermiş təyyarə qəzası da var. Biz inanırıq ki, beynəlxalq hüquq sonda öz sözünü deyəcək və Azərbaycanın mövqeyi dəstəklənəcək.”
C.Məmmədovun fikirincə, hadisə ilə bağlı artıq konkret faktlar ortadadır: “Əminik ki, Azərbaycan öz cavabını alacaq. Çünki burada bütün faktlar göz önündədir, hər şey aydındır. Rusiya tərəfi bu faktları gizlədə bilməz. Cinayətkarlar da məlumdur və səsyazılar mövcuddur. Bizim əlimizdə bu işləri törədən şəxslər barədə tam məlumat var. Bu səbəbdən hesab edirəm ki, Azərbaycanın atdığı bu addım çox önəmlidir və bu istiqamətdə ciddi nəticələr olacaq.”
Mehriban Yariyeva
14:29 22.07.2025
Oxunuş sayı: 5257
