Türkiyəli ekspert: “Paşinyan səmimi qəlbdən Azərbaycanla Ermənistan arasında sülh arzulayır”
Azərbaycan Prezidenti İlham Əliyev iyulun 19-da III Şuşa Qlobal Media Forumunun iştirakçıları ilə görüşdə bildirib ki, Azərbaycan ABŞ-yə Cənubi Qafqazdakı proseslərə diqqət yetirdiyi üçün minnətdardır: "Biz ona şəxsən Azərbaycan və Ermənistana razılığa gəlməkdə kömək etmək istəyinə görə çox minnətdarıq, baxmayaraq ki, o, beynəlxalq təhlükəsizliyin daha qlobal məsələləri ilə məşğuldur. Cənubi Qafqazdakı vəziyyəti də diqqət mərkəzində saxlayır. Biz Azərbaycanda, əlbəttə ki, onun bir çox səbəblərdən qalib gəlməsinə şadıq və təbii ki, ona işini sona çatdırmağını arzulayırıq".
Bundan əvvəl isə Tramp Azərbaycanla Ermənsitan arasında sülhün çox yaxın olduğunu dəfələrlə bildirib.
Ümumiyyətlə, son zamanlar Cənubi Qafqazda çox ciddi proseslər baş verir. Azərbaycan Prezidenti İlham Əliyevlə Ermənistan baş naziri Nikol Paşinyanın BƏƏ-dəki vasitəçisiz görüşü də perspektivlə bağlı ümidləri artırır. Hər iki tərəfdən verilən məlumata görə, görüş konstruktiv keçib.
Cənubi Qafqazdakı mövcud dinamika barədə Crossmedia.az-a danışan türkiyəli hərbi ekspert Mithat Işık qeyd edib ki, Paşinyan səmimi qəlbdən Azərbaycanla Ermənistan arasında sülh arzulayır, lakin erməni diasporunu sıxışdıra bilmir: “Sülh bizim region üçün olduğu kimi Ermənistan üçün də vacibdir. Ermənistanda əhali hər gün azalır, işsizlik faizi yüksəkdir, insanlar yoxsuldur. İnanıram ki, sülh mümkündür. Sülh digər problemlərin həllini asanlaşdıracaq.
Ermənistanın Azərbaycanla hərbi münaqişəyə girməsi mümkün deyil. Erməni diasporu öz inadından əl çəkməli, sülhü dəstəkləməlidir”.
Kənan Novruzov
16:26 20.07.2025
Oxunuş sayı: 7216
