“Zəngəzur dəhlizi Azərbaycan və Ermənistan arasındakı məsələdir” - Deputat
Rusiya Dövlət Dumasının deputatı Konstantin Zatulin açıqlamasında Ermənistan və Azərbaycan, Rusiya arasında baş verən gərginliklərin səbəbi kimi Zəngəzur dəhlizini göstərib. Bu açıqlama bir sıra mühüm sualları doğurur: Görəsən, Rusiya bu dəhlizin açılmasına əngəl olmaq üçün prosesləri qızışdırır? Yoxsa Moskva bu məsələni öz maraqlarını qorumaq və bölgədəki təsirini saxlamaq üçün sadəcə bəhanə kimi istifadə edir?
Mövzu ilə bağlı Milli Məclisin deputatı Ceyhun Məmmədov Crossmedia.az-a açıqlama verib: “Prosesləri təhlil edəndə səbəbin yalnız bu olduğunu demək doğru deyil. Biz Rusiyanın son zamanlar bizə qarşı qərəzli siyasət həyata keçirdiyini görürük. Rusiyada yaşayan azərbaycanlıların həbsi, iş adamlarına yaradılan maneələr - bütün bunlar deməyə əsas verir ki, Rusiya Azərbaycana qarşı güclü kompaniya aparır. Məsələnin mahiyyəti tək bunda deyil. Həmin deputata demək lazımdır. Bu günə kimi Rusiya tərəfi təyyarə qəzası ilə bağlı Azərbaycandan üzr istəməyib. Bu günə kimi bu mövzuda niyə heç bir addım atmayıb? Niyə heç bir iş görməyib? Əsas məsələləri kənara qoyub mənasız əsaslar gətirmək lazım deyil. Rusiya bu cür addımlara son qoymalıdır. Zəngəzur dəhlizinə gəldikdə isə bu Azərbaycan və Ermənistan arasındakı məsələdir. Yaxşı olar ki, Rusiya azərbaycanlılara qarşı ayrıseçkiliyə son qoysun və bu prosesi dediyimiz istiqamətdə aparsın”.
Ayhan
16:08 15.07.2025
Oxunuş sayı: 878
